363
Буряад Уласай Толгойлогшо Алексей Цыденов Гүрэнэй зүблэлэй комиссиин «Ажамидарал хангаха ажахы» гэһэн шэглэлээр эмхидхэгдэһэн суглаанда хабаадаба. Россиин нютаг можонуудта барилгын һалбари хүгжөөхэ шухала шэглэлнүүдээр суглаанда хэлсээ. Буряадай Толгойлогшо Россиин Засагай газарай Түрүүлэгшын орлогшо Марат Хуснуллинтай уулзалгада мүн хабаадаа. Марат Хуснуллинай тэмдэглэһээр, хуулида мастер-түсэб гэһэн ойлгосо баримталха талаар заһабари нэмэлтэнүүдые оруулха ажал түгэсэхэнь. Тэрэнэй ёһоор, хотодо барилга ябуулха талаар ажал хүнгэдхэгдэхэ үүргэтэй.
Россиин Юрэнхылэгшын ба Засагай газарай дэмжэлгээр, барилгын һалбарида саг үргэлжэ анхаралаа хандуулһанай ашаар гэр байрын ба хотын оршон болбосон түхэлтэй болгохо талаар һайн дүнгүүд туйлагдаа гэжэ Татарстанай Толгойлогшо, «Ажамидарал хангаха ажахы» гэһэн шэглэлээр Гүрэнэй зүблэлэй комиссиин түрүүлэгшэ Рустам Минниханов тэмдэглээ.
Барилгын һалбари ямаршье сагта эрхэтэдэй ажамидаралай шанар элирхэйлдэг байгаа, мүнөөшье тэрээндэ нүлөөлһөөр гэжэ Россиин Юрэнхылэгшын туһалагша, Гүрэнэй зүблэлэй комиссиин секретарь Алексей Дюмин нэмэбэ.
- Россиин эрхэтэдые гэр байрын тааруу зохид байдалаар хангаха ёһотойбди. Мүнөөдэрэй шиидхэбэринүүд ипотекын урьһаламжа хүгжөөхэ ёһотой, тэрэнэй ашаар ехэнхи зоной гэр байрын асуудал шиидхэгдэхэ болоно ха юм. Тиихэдэ гэр байрын болон коммунальна хангамжын шанар дээшэлүүлхэ, сэнгүүдэй баримтагүй ургалтаһаа эрхэтэдые хамгаалха гээшэ тон шухала. Ниигэмэй талаар хамгаалалтагүй эрхэтэдые дэмжэхэ нэмэлтэ арга боломжонуудые зохёон байгуулга үргэлжэлүүлхэ хэрэгтэй. Тиихэдэ сэрэгэй тусхай үйлэ хэрэгүүдтэ хабаадагшадые, тэдэнэй гэр бүлэнүүдые дэмжэхэ тухай бү мартая. Россиин Юрэнхылэгшэ манай урда иимэ зорилгонуудые табяа, - гэжэ Алексей Дюмин хэлэбэ.
Алексей Цыденов ба Марат Хуснуллин Буряад Уласай ниигэмэй ба экономикын хүгжэлтэ тухай зүбшэн хэлсэбэ. Россиин Засагай газарай Түрүүлэгшын орлогшын тэмдэглэһээр, Буряад орондо хангамжын ажахы хүгжөөхэ ажал һайнаар ябуулагдана. Һүүлэй хэдэн жэлэй туршада һургуулинууд, хүүгэдэй сэсэрлигүүд, соёлой ба эмнэлгын эмхи зургаанууд баригдана.
- Уулзалга дээрэ Буряад Уласай харгынуудые, ниитын транспорт хүгжөөлгын, гэр байра барилгын асуудалнууд харагдаа. 2023 онтой сасуулбал, 2024 ондо 40 хубяар ехэ гэр байра ашаглалда тушаагдаа. 2025 ондо Буряад Уласта Россиин Барилгын яаманай түсэбһөө үлүү гэр байра барихаар хараалагдана, - гэжэ Алексей Цыденов хэлэбэ.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
