​Буряад Уласта «Минии аба- герой» гэһэн дурасхаалай тэмдэгүүд хүүгэдтэ барюулагдаа

Буряад Уласай Толгойлогшо Алексей Цыденов Эсэгэ ороноо хамгаалагшадай һайндэр угтуулан, «Минии аба - Герой» гэһэн дурасхаалта тэмдэгүүдые сэрэгэй тусхай үйлэ хэрэгүүдтэ хабаадагшадай хүүгэдтэ барюулаа.

- Эсэгэ ороноо хамгаалагшадта баяраа мэдүүлнэбди. Мүнөөдэр манай сэрэгшэд байлдаанай газарта манай ерээдүйн түлөө дайлалдана, баатаршалга харуулна, Эхэ оронойнгоо түлөө ами наһаяа үгэнэ. Бусаагүй сэрэгшэдэй түрэлхидтэ онсо анхаралаа хандуулха ёһотойбди. Танай бүлгэмдэ, танай ангида, танай танил зонууд соо абанараа, аханараа алдаһан үхибүүд бии. Эхэ оронойнгоо түлөө алдалан унаһан сэрэгшэдые һанажа, мэдэжэ ябагты, түрэлхидтэнь туһалагты. Баатарлиг сэрэгшэдһээ жэшээ абажа, тэдэнээр омогорхожо, Эхэ орондоо дуратай ябагты,- гэжэ залуушуулда Алексей Цыденов хандаба.

 «Минии аба - Герой» гэжэ дурасхаалай тэмдэг Ородой Холбоото Уласай Герой, лейтенант Максим Концовой басагадта барюулагдаба: Лилия Концова - «Россиин эдир талаан бэлигтэйшүүл» гэһэн уласхоорондын фестиваль-конкурсын лауреат, «Шэнэ галханууд» гэһэн дуунай бүхэроссиин  конкурсын лауреат. Маргарита Концова - фортепиано дээрэ наадалгаар «Талаан бэлигэй жэгүүртэ» гэһэн уласхоорондын фестиваль-конкурсын лауреат, «Россиин эдир талаан бэлигтэйшүүл» фестиваль-конкурсын лауреат,  «Шэнэ галханууд» гэһэн дуунай бүхэроссиин  конкурсын лауреат.

«Шэн зоригой түлөө» орденоор шагнагдаһан сэрэгшэ Александр Шокунай басаган Диана Шокун мүн шагнагдаа. Тэрэ элдэб түсэлнүүдтэ эдэбхитэй хабаададаг юм.

«Шэн зоригой түлөө» орденоор шагнагдаһан сэрэгшэ Вадим Чагдуровай Виктория басаган «Рябинушка» сэсэрлигтэ ябадаг, тэрэ буряад хэлэ үзэнэ, дуу дуулажа һурана, гимнастикаар бэеэ һорино. Виктория Чагдуровада «Минии аба - Герой» гэһэн дурасхаалай тэмдэг барюулагдаа

СибГУТИ-иин оюутан, волейболоор суглуулагдамал командын гэшүүн, ГТО-гой алтан тэмдэгээр шагнагдагша, «Минии аба - Герой» гэжэ дурасхаалта тэмдэгэй эскиз байгуулха уласай конкурсын илагша Наталья Борисова  сэрэгэй тусхай үйлэ хэрэгүүдтэ хабаадажа байһан Петр Борисовай басаган. Наталья мүн дурасхаалта тэмдэгээр шагнагдаа.