483
Буряад Уласай Толгойлогшо Алексей Цыденов сэрэгэй тусхай операциин ветерануудтай уулзаба. Уулзалга февралиин 22-то «Эсэгэ ороноо хамгаалагшад» гэһэн жасын таһагта үнгэргэгдэбэ. Алексей Цыденов сэрэгэй тусхай үйлэ хэрэгүүдтэ хабаадаһан 11 сэрэгшэдэ «Баяр хүргэгшэ Буряад орон» гэһэн медаль барюулба, ветерануудай асуудалнуудта харюусаба.
- Бидэ Эсэгэ ороноо хамгаалагшын һайндэр тэмдэглэнэбди. Мүнөө энэ һайндэр ондоо оршондо үнгэржэ байна. Теэд дайшалхы үйлэ хэрэгүүд хэзээб даа дүүрэхэ. Зарим сэрэгшэд мүнөө гэртээ, амгалан байдалда бусажа ерэнэ. Буряад Уласай Засагай газар сэрэгшэдтэ шэнэ мэргэжэлтэй болоходонь, олзын хэрэг эрхилхэ хэрэгтэнь туһалха зорилготой. Тиимэһээ нюур нюураараа уулзаха гээшэ тон шухала, - гэжэ уласай Толгойлогшо тэмдэглээ.
Амгалан байдалай оршондо дадаха, дээдэ ба дунда мэргэжэлтэй болохо, ниигэмэй хэлсээ баталха, үмсын фермэ нээхэ хэрэгтэ дэмжэлгэ үзүүлхэ, газар абаха гэхэ мэтэ асуудалнуудаар ветеранууд һонирхоо. Зүбшэн хэлсэлгын үедэ Алексей Цыденов яамануудай, эмхи зургаануудай түлөөлэгшэдтэ табигдаһан асуудалнуудаар шиидхэбэри абаха даабаринуудые үгэбэ.
- Олон ветеранууд өөрын хэрэг эрхилхэ хүсэлтэй, теэд юунһээ эхилхэб гэжэ тэдэ мэдэнэгүй. Һаяын сагта «Эсэгэ ороноо хамгаалагшад» гэжэ жасын таһаг «Минии олзын хэрэг», Буряад Уласай Хүдөө ажахын яаманай мэдээсэлэй түбүүдтэй хамта һургалгын программа бэелүүлжэ эхилхэ, - гэжэ Буряадай Толгойлогшо нэмэбэ.
Сэрэгэй тусхай операциин ветерануудай эблэлэй таһагуудые Буряад Уласай бүхы аймагуудта байгуулха тухай дурадхал оробо. Һануулхада, тус эблэл 2023 ондо ветерануудай үүсхэлээр, Буряад Уласай Засагай газарай, Россиин ветерануудай эмхи зургаануудай дэмжэлгээр бии болоо һэн. Эмхи зургаанай штаб 2025 оной январиин 30-да Улаан-Үдэ хотодо байгуулагдаа. Тус эблэл сэрэгэй тусхай үйлэ хэрэгүүдтэ хабаадагшадые нэгэдүүлхэ, тэдэнэй эрхэ хамгаалха, олониитын ажабайдалда хабаадуулха, ургажа ябаа үетэниие Эхэ орондоо дуратайгаар хүмүүжүүлхэ зорилготой. Мүнөө эмхи зургаанда элдэб хэмжээ ябуулганууд эмхидхэгдэнэ.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
