459
Мартын 4-һөө мартын 6 болотор Улаан-Үдэдэ Буряадай гүрэнэй ехэ һургуулиин заншалта эмнэлгын институдта «Буряад ороной заншалта эмнэлгэ: элүүр энхын түлөө шэнэ зүйлнүүдые нэбтэрүүлгэ» гэһэн уласхоорондын хуралдаан үнгэргэгдэхэ. Хуралдаанай үедэ Россиин, Хитадай, Монголой мэргэжэлтэд дүй дүршэлөөрөө хубаалдаха.
- Манай Буряад орон эрдэмэй талаар эгээ ехэ баазатай. Монголые, буддын шажан, Түбэдые шэнжэлдэг Росси дотор ори ганса институт манай Буряад орондо байна. Буряадай эрдэмэй түбтэ 200 гаран клиническэ диссертаци бэлдэгдээ, тэрэ тоодо Түбэд эмнэлгын атласай гар бэшэлгэнүүд шэнжэлэгдээ,- гэжэ Буряад Уласай Засагай газарай Түрүүлэгшын орлогшо - Элүүрые хамгаалгын сайд Евгения Лудупова хөөрэбэ.
Хуралдаанай үедэ хэдэн секци хүдэлхэ. Хабаадагшад элүүрые хамгаалгын һалбарида заншалта эмнэлгын дүй дүршэл нэбтэрүүлхэ тухай зүбшэн хэлсэхэһээ гадна ажаһуугшадай элүүржүүлгэ тухай хэлсэхэ. Тиихэдэ хитад болон монгол заншалта эмнэлгын, һудаһаар үбшэ элирүүлэлгын, үбшэнэй удаа элүүржүүлгын остеопати гэһэн шэглэлнүүдээр мастер-классууд үнгэргэгдэхэ.
Мүнөөдэрэй байдалаар заншалта эмнэлгэдэ хуулиин талаар бэрхэшээлнүүд тохёолдоно. Эдэ асуудалнуудые шиидхэхын талаар хэмжээ ябуулгада Гүрэнэй Дүүмын һунгамалнууд хабаадаха гэжэ Элүүрые хамгаалгын сайд тэмдэглээ.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
