Сэрэгэй тусхай үйлэ хэрэгүүдэй 13000 гаран ветерануудта туһаламжа Буряадта үзүүлэгдээ

2023 онһоо хойшо «Эсэгэ ороноо хамгаалагшад» гэжэ гүрэнэй жасын Буряад Уластахи таһагта 31100 хандалга ороһон байна. 29 700 асуудалаар шиидхэбэри абтаа (95%).

- Нютаг можын таһаг Эхэ ороноо хамгаалагшадта, тэдэнэй гэр бүлэнүүдэй гэшүүдтэ дэмжэлгэ үзүүлхын талаар үдэр бүри ажалаа ябуулна. Хүн бүхэндэ залан хүтэлбэрилэгшэ томилогдожо, эмнэлгын, ниигэмэй, һуралсалай ба ажалай асуудалнуудаар туһа хүргэнэ.  Бодото ажабайдалда бусаха талаар сэрэгшэдтэ туһалнабди, хамгаалагшадай бүлэнүүдые дэмжэнэбди, - гэжэ гүрэнэй «Эсэгэ ороноо хамгаалагшад» жасын Буряад Уластахи таһагай хүтэлбэрилэгшэ Илья Михалев тэмдэглэбэ.                                                                                                                               Уласай бүхы аймагуудта ниигэмэй 60 залан хүтэлбэрилэгшэ хүдэлнэ. Жасын дэргэдэ МФЦ-н, Россиин Ниигэмэй жасын, Ажаһуугшадые ажалаар хангалгын түбэй, Сэрэгэй ба ниигэмэй түбэй, бэшэшье эмхи зургаануудай түлөөлэгшэд хүдэлнэ. Эдэнэр тусхай һуралсал гаража, элдэб асуудалнуудаар сэрэгшэдтэ туһалдаг, тэрэ тоодо һуралсалай, мэргэжэлээ дээшэлүүлгын г.м. Ажалда ороходонь, саарһа дансаяа шэнэлхэдэнь, ниигэмэй талаар дэмжэлгэ абахадань мүн туһална. Жасын ажалтан саг үргэлжэ мэргэжэлээ дээшэлүүлжэ байдаг, сэрэгэй тусхай үйлэ хэрэгүүдтэ хабаадагшадта, тэдэнэй гэр бүлэнүүдэй гэшүүдтэ сэдьхэлэй байдалай талаар туһаламжын стандарт шудалдаг. Нютаг можын таһаг эмнэлгын ба соёлой эмхи зургаануудтай нягта холбоотой хүдэлдэг. Дайшалхы үйлэ хэрэгүүдэй ветеранууд түрүүшын ээлжээнэй гуримаар диспансеризаци гарадаг, тоглолтонуудта ба соёлой хэмжээ ябуулгануудта урилгын биледүүдые абадаг. Тэрээнһээ гадуур гүрэнэй жаса ветерануудые эм домоор, эмнэлгын бүтээлнүүдээр, бэе һэргээлгын хэрэгсэлнүүдээр хангаха үүргэтэй.

Жасын мэргэжэлтэд үхибүүдые, эдиршүүлые, залуушуулые Эхэ орондоо дуратайгаар хүмүүжүүлхэ талаар хэмжээ ябуулгануудые  эмхидхэдэг.  Шэн зоригой хэшээлнүүдые, уулзалгануудые тэдэ эдэбхитэйгээр үнгэргэдэг юм. Тиихэдэ эрэмдэг бэетэй ветерануудай хабаадалгатай тамирай хэмжээ ябуулганууд олоор ябуулагдана. «Эсэгэ ороноо хамгаалагшад» жасын Буряад Уластахи таһаг Ородой Холбоото Уласай Хамгаалгын яамантай нягта холбоотой мүн хүдэлдэг.