«Буряадай патриодууд» гэһэн программа улас дотор бэелүүлэгдэжэ эхилбэ

Буряад орондо сэрэгэй тусхай үйлэ хэрэгүүдтэ хабаадагшадта, ветерануудта зорюулагдаһан «Буряадай патриодууд» гэжэ болбосоролой программа бэелүүлэгдэжэ эхилбэ. Ородой Холбоото Уласай Юрэнхылэгшэ Владимир Путин «Баатарнуудай саг» гэһэн холбоото уласай түсэл бэелүүлжэ эхилһэн байна. Тэрэнэй дүнгүүдээр нютаг можонуудта түсэл бэелүүлхэ шиидхэбэри абтаа. Уласай программада хабаадахын тула ПАТРИОТЫБУРЯТИИ.РФ сайтда орожо, асуудалнуудта харюу үгэхэ хэрэгтэй. Захяанууд мартын 28 болотор абтаха.

Байгша оной февралиин 25-да «Буряадай патриодууд» программын нютаг можын ниитын Зүблэлэй суглаан Буряад Уласай Толгойлогшо Алексей Цыденовэй ударидалга доро үнгэргэгдэбэ. Хэмжээ ябуулгада засагай органуудай, олониитын эмхи зургаануудай, Ажалаар хангалгын улас түрын агентствын, үйлэдбэринүүдэй, «Эсэгэ ороноо хамгаалагшад» жасын Буряад Уластахи таһагай түлөөлэгшэд, сэрэгэй тусхай үйлэ хэрэгүүдэй ветеранууд хабаадаба.

- Энэ программа Эсэгэ ороноо хамгаалагшадта, манай хүбүүдтэ, манай баатарнуудта зорюулагдажа, амгалан байдалай оршондо һанал хүсэлөө бэелүүлхэдэ, олониитэдэ, уластаа, гүрэндөө туһатай байха талаар шэнэ юумэндэ һурахада хэрэгтэй. Программаар һуража гарагшадые бидэ хүтэлбэрилхы, дунда шатын тушаалнуудта, олзын хэрэгтэ, гүрэнэй засагта, болбосоролой бүхы һалбаринуудта, элүүрые хамгаалгада, барилгада ажалда абаха аргатайбди,- гэжэ Буряадай Толгойлогшо тэмдэглээ.

Уласай «Буряадай патриодууд» программада хабаадаһан сэрэгшэд гүрэнэй ба муниципальна албанай, томо-томо үйлэдбэринүүдэй хүтэлбэрилхы тушаалда хүдэлхэ дадал шадабаритай боложо гараха. Һуралсал Юрэнхылэгшын академиин (ВШГУ РАНХиГС) стандартаар байгуулагдажа, байгша оной июлиин 1-дэ Буряадай гүрэнэй университедэй бааза дээрэ эхилхэ. Академическэ, соёлой, тамирай, Эхэ орондоо дурлал түрүүлхэ модульнууд, хүтэлбэрилхы мастерскойнууд, модуль хоорондын хэмжээ ябуулганууд программын бүридэлдэ оруулагдаа. Программаар һурагшад залан хүтэлэгшэдтэй, тобшолол хэдэг мэргэжэлтэдтэй хүдэлхэ, үйлэдбэринүүдтэ ба засагай органуудта стажировко гараха. Бүхы хабаадагшадые Ажалаар хангалгын Улас түрын агентство залан хүтэлхэ, ажалай сүлөө һууринуудые дурадхаха. Мүнөөдэрэй байдалаар Буряадай мэдээжэ үйлэдбэринүүд программын холбоо нүхэд болонхой. Мэргэжэлтэ ба хүтэлбэрилхы дүршэл абаһанай удаа программаар һуража гараһан эрхэтэдтэ ажалда орохыень дурадхаха. Сэрэгэй алба гаража байһан зон уялгаяа дүүргээд һураха аргатай.