Буряад Уласта үндэһэтэнэй «Гэр бүлэ» гэһэн түсэл бэелүүлэгдэнэ

Энээн тухай Буряад Уласай Хүн зониие ниигэмэй талаар хамгаалгын сайд Татьяна Быкова «Шухала юумэн тухай сэхэ руунь» гэһэн пресс-клубай үедэ мэдээсэбэ. Хэмжээ ябуулга «Нарата» пансионадта үнгэргэгдэбэ. Эндэ үндэһэтэнэй «Демографи» түсэлэй дүнгүүд согсологдоо, «Гэр бүлэ» гэжэ үндэһэтэнэй түсэлэй түсэбүүд хараалагдаа.

– Таанад «Нарата» пансионадай байшан дотор байнат. Энэ байшан барихын тула 10 жэлэй туршада ажал ябуулагдаа. Хэдэн дахин түсэлэй саарһа дансада нэмэлтэ хубилалтанууд оруулагдаа. Байшан гурбан дабхартайгаар баригдаха аад лэ, мүнгэн зөөриин хизаарлагдаһан ушарһаа хоёр дабхартайгаар баригдаа.  Тиигэбэшье пансионат Россиин үргэн дэлисэтэй түсэлнүүдэй нэгэн болоо. Энээн тухай холбоото уласай сайд Антон Олегович Котяков тэмдэглээ. Барилгын газар алдахагүйн тула тэндэ хартаабха һуулгадаг байгаабди,- гэжэ Татьяна Быкова хөөрэбэ.

Наһатайшуулай ба эрэмдэг бэетэй зоной «Нарата» пансионат 2023 оной сентябрь һарада нээгдээ һэн. Барилгада 1,5 млрд түхэриг гаргашалагдаа. Мүнөө тааруу зохид оршон байдалда 155 ветеран ажаһууна.

– Сэрэгэй тусхай үйлэ хэрэгүүдтэ хабаадагшадай байха таһалганууд эндэ бии. Бидэ зорюута эдэ таһалгануудые бэлдээбди. Хизаарлагдамал арга боломжотой зондо тон зохид байра байдал түхеэрэгдэнхэй. Тэдэ ямаршье сагта пансионат ерэжэ, элдэб хэмжээ ябуулгануудта хабаадаха, бэеэ элүүржүүлхэ аргатай, - гэжэ  Буряад Уласай Хүн зониие ниигэмэй талаар хамгаалгын сайд Татьяна Быкова тэмдэглээ.

«Гэр бүлэ» гэжэ үндэһэтэнэй шэнэ түсэл наһатай зониие дэмжэхэ хэрэг үргэлжэлүүлхэ. Үндэһэтэнэй түсэлдэ «Гэр бүлэ дэмжэлгэ», «Олон  үхибүүтэй бүлэ»,  «Аха захатан» гэжэ холбоото уласай түсэлнүүд ороно.

– Бидэ 2 түсэл хамгаалжа шадаабди. Мүнөө федеральна мүнгэн зөөри бидэндэ шэглүүлэгдэнэ. Загарайн гэр-интернат заһабарилха түсэб бии, тиихэдэ Захааминай аймагай Баянгол һууринда ниигэмэй хангамжын комплексно түбтэ 100 һууритай байшан баригдахаар хараалагдана. 2025-2027 онуудта 867 сая түхэриг һомологдохо,- гэжэ Татьяна Быкова хэлэбэ.

Мүнөө Буряад Уласта «Эдэбхи ехэтэй ута наһан» гэжэ программа зохёон байгуулагдана. Тус программа олониитын хэмжээ ябуулгануудта наһатайшуулые хабаадуулха эрхэ нүхэсэл байгуулха зорилготой. Тамирай, болбосоролой, соёлой, һайн дуратанай эмхи зургаануудые программа нэгэдүүлхэ. 2025 ондо наһатай зоной 47 хубииень (90000 хүниие) уласай ба нютагай хэмжээнэй ябуулгануудта хабаадуулхаар түсэблэгдэнэ.  2030 ондо энэ тоо наһатайшуулай 56,5 хубиһаа бага бэшэ байха ёһотой. Хэмжээ ябуулгануудта эдэбхитэй хабаадалга наһатайшуулай амидарал утадхаха, энэ эрдэмэй талаар гэршэлэгдэнхэй гэжэ сайд Татьяна Быкова тэмдэглээ. Тиихэдэ түрүүшын үхибүүтэй болоһон бүлэнэртэ нэгэ удаа үзүүлэгдэдэг дэмжэлгэ, нютаг можын (Алас Дурнын) эхын капитал түлэхэ хэрэг үргэлжэлхэ. Һаяын 3 жэлэй туршада 18,6 мянган бүлэдэ 2,6 млрд түхэриг шэглүүлэгдэхэ. Шэнэ түсэлдэ ниигэмэй хэлсээн мүн ороно. Олон үхибүүтэй бүлэнэр ниигэмэй хэлсээ түрүүлэн баталха эрхэтэй. Мүнөө жэлдэ энэ шэглэлээр 433 сая түхэриг һомологдоо, 1977 бүлэ дэмжэлгэдэ хүртэхэ. «Гэр бүлэ» гэжэ үндэһэтэнэй түсэлэй хэмжээ ябуулгануудые бэелүүлгэдэ  һаяын 3 жэлэй хугасаа соо дүн хамта 4,5 млрд түхэриг гаргашалагдаха юм.