584
Сагаалганай һайндэрһөө сэхэ дамжуулга Буряад ТВ ба орос-монгол AIST Global теле-субаг эмхидхэхэ. Дамжуулга «Сугтаа сагаалая!» - «Встречаем Белый месяц вместе!» гэжэ нэрлэгдээ.
- Сагаа һарын һайндэрэй үедэ түрэлхид уулзажа, аха захатанаа золгодог, бэе бэеэ амаршалдаг, һайн һайханиие хүсэдэг, һонинуудаараа хубаалдадаг. Телемостын ашаар холо ойгуур ажаһуудаг түрэлхид бэе бэеэдээ мэндэеэ хүргэжэ, ёһо заншалнуудаа һэргээн харуулха аргатай. Үбэр Байгалай хизаарта Буряад ТВ-н таһаг, Монголдо түрүүшын ба ори ганса AIST Global теле-субаг нээгдээ. Тиимэһээ телемост үнгэргэхэ аргатай болообди. Тэрэнэй ашаар буряад-монгол олониитэ нэгэдэнэ, эб найрамдалай “хүүргэ” бэхижэнэ,- гэжэ Буряад Уласай Толгойлогшо Алексей Цыденов хөөрэбэ. Орос-монгол AIST Global ба Буряад ТВ теле-субагуудай студида арадайнгаа ёһо заншалнуудые тэрэ зандань үлээхэ хэрэгтэ, Росси Монгол гүрэнүүдэй холбоо, хани барисаа бэхижүүлхэ хэрэгтэ хубитаяа оруулжа байһан соёлой ба тамирай габьята ажаябуулагшад, олониитын түлөөлэгшэд, фермернүүд, олон үхибүүдтэй бүлэнүүд сугларха.
Улаан-Үдэ, Улаан-Баатар хотонуудай ба Ага тосхоной үйлсэнүүдһээ сэхэ дамжуулгын үедэ ажаһуугшад бэе бэеэ амаршалжа, түсэбүүдээрээ хубаалдаха аргатай. 3 студида сугларһан айлшад дуунуудаа, хатарнуудаа бэлэглэхэ, үреэлнүүдые хэлэхэ. «Сугтаа сагаалая!» гэжэ телемост байгша оной мартын 1-дэ 15:00 сагһаа эхилхэ.
Буряад ТВ – Буряад Улас, AIST Global – Монгол гүрэн, Буряад ТВ – Үбэр Байгал.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
