1133
Улаан-Үдэ хотодо Монгол гүрэнэй генеральна консул Дэмбэрэл Нямцэрэн Агван Доржиевай медаляар шагнагдаба. Арадуудай хоорондо хани барисаа, амгалан байдал бэхижүүлхэ хэрэгтэ, олониитын ба тэдхэмжэ үзүүлэлгын ажаябуулгада эдэбхитэй хабаадажа байһан Дэмбэрэл Нямцэрэн Буряад Уласай үмэнэ гайхамшагта габьяагай түлөө үндэр шагналда хүртэбэ. Энээн тухай зарлигта Буряад Уласай Толгойлогшо Алексей Цыденов гараа табиба.
Февралиин 27-до үнгэргэгдэһэн Буряад Уласай Арадай Хуралай сессиин үедэ генеральна консул гүйсэдхэхы ба хуули бүридхэлгын засагта, Буряадай ниислэлэй засагай газарта, Россиин Гадаадын хэрэгүүдэй яаманай Буряад Уласай таһагта аша үрэтэй хамтын ажалай түлөө баяр хүргэбэ.
- Энэ тушаал минии эзэлхэдэ, хорото үбшэн эхилээ, хилэ хаагдаа. Үбшэнэй бараг болоходо, богони сагай болзор соо уласхоорондын холбооной хэмжээ һэргээжэ, урид байһан хэбтэнь бусаахаһаа гадна шэнэ үндэрнүүдые дабаха ёһотой байгаабди. Бултанай хүсөөр зорилгонуудаа бэелүүлээбди. Мүнөөдэр Монголой ба Россиин харилсаан хүгжэһөөр, - гэжэ генконсул тэмдэглэбэ. Тиин Улаан-Үдэдэ Монголой түлөөлэгшын тушаал сүлөөлхэ тухай Дэмбэрэл Нямцэрэн мэдээсэбэ. Монгол гүрэнтэй экономикын ба соёлой талаар харилсаа бэхижүүлхэ ажал Буряад Уласта үргэлжэлхэ гэһэн найдалаа тэрэ мэдүүлээ.
- Буряад Улас манда дүтэ байдаг нютаг можо, бидэ адли ёһо заншалнуудтайбди, нэгэ соёлтойбди, нэгэ түүхэтэйбди, дүтын харилсаатайбди, бэе бэеэ тон һайнаар ойлгодогбди. Хилэ шадарай дэбисхэрнүүдэй бүхы һалбаринуудта хамтын ажаябуулга эдэбхитэй хүгжэнэ. Минии харюусалгатай үүргэ дүүрэхэ шатадаа ерэбэ. Үндэр шанда хүртэбэб, намайе дэмжэһэндэтнэй бултанда баяраа мэдүүлнэб. Россиин ба Буряад Уласай арад зондо мүн баяр хүргэнэб. Саашадаа элүүр энхэ, амгалан тайбан ажаһуухыетнай хүсэнэб,- гэжэ Дэмбэрэл Нямцэрэн хэлэбэ.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
