«Манай Буряад орон» гэһэн нээмэл суглаан Буряад Уласта үнгэргэгдэхэ

Буряад Уласай Засагай газар мартын 12-то үнгэргэгдэхэ «Манай Буряад орон» гэжэ нээмэл суглаанда улас дотор бэелүүлэгдэһэн үндэһэтэнэй түсэлнүүдэй дүнгүүд согсологдохо, мүн шэнэ түсэлнүүдтэй танилсалга болохо. Тэрээнһээ гадуур стратегическа сессинүүд үнгэргэгдэхэ юм. Эндэ тобшолол хэдэг мэргэжэлтэд, олониитын, эрдэмэй, олзын хэрэгэй түлөөлэгшэд хабаадажа, Буряад Уласай ниигэмэй ба экономикын талаар хүжэлтын һанал бодолнууд ба түсэлнүүд тухай хөөрэлдэхэ. Хэмжээ ябуулга уласай ажаһуугшадтай холбоо үргэдхэхэ хэрэгтэ онсо анхаралаа хандуулха.

- Уласай хүгжэлтэдэ хамтын лэ хүсөөр һайн дүнгүүдые туйлахабди. Тобшолол хэдэг мэргэжэлтэдэй, ажаһуугшадай дурадхалнуудые, һанал бодолнуудые шухала, урид эхилэлгын шэглэлнүүдээр суглуулхабди. Уласай Засагай газарай нээмэл суглаан шэнэ үйлэ хэрэг бэшэ болоно, анха түрүүшынхиеэ иимэ хэмжээ ябуулга 2020 ондо үнгэргэһэн байнабди. 1084 һанал бодолнууд, үүсхэлнүүд ба түсэлнүүд стратегическэ сессинүүдэй дүнгүүдээр үгтөө һэн. Тэдэнэй 70 хубинь бэелүүлэгдээ. Жэшээнь, мүнөө сагай урлалай буряад түб нээгдээ, олон үхибүүтэй гэр бүлэнүүдтэ автотранспортын хүнгэлэгдэмэл татабари үгтөө, ТОС-уудай мүрысөөнэй шангай жаса ехэ болоо, үндэһэтэнэй буряад телевидени нээгдээ, бэшэшье үүсхэлнүүд бэелүүлэгдээ,- гэжэ Буряад Уласай Толгойлогшо Алексей Цыденов хэлэбэ.

Мүнөө жэлэй стратегическэ сессидэ гурбан шэнэ талмай нэмэгдээ. Тиигэжэ бүлгэмүүд 15 шэглэлээр ажалаа ябуулха.

- Нээмэл суглаанда ба талмайнуудай ажалда хабаадаха дуратай 2000 гаран хүн мэдүүлгэ эльгээгээ. Энэ хэмжээ ябуулгада эдэбхи ехэтэй эрхэтэдые уринабди. Аймаг бүхэн делегадуудые, яамануудай, эмхи зургаануудай ниитын зүблэлнүүд өөһэдынгөө тобшолол хэдэг мэргэжэлтэдые эльгээхэ. Буряад Уласай Толгойлогшын ба Засагай газарай дэргэдэхи зүбшэлэлгын органууд делегадуудаа мүн хабаадуулха. «Бурятия», Ариг Ус, Тивиком, АТВ ба Буряад ТВ теле- субагууд мартын 12-то 10 сагһаа агаарай долгёор хэмжээ ябуулга дамжуулха. Тиимэһээ Буряад ороной ажаһуугшад нээмэл суглаа гэртээ һуугаад хараха аргатай, - гэжэ Буряад Уласай Толгойлогшын ба Засагай газарай Захиргаанай хүтэлбэрилэгшын орлогшо Ирина Доржиева мэдээсээ. 

Дурадхалнуудаа, хабаадаха тухай мэдүүлгэ kip@govrb.ru хаягаар мартын 6 болотор эльгээжэ болоно.