Буряад Уласта «Баатарнуудай саг» гэһэн программа жэлэй туршада бэелүүлэгдэнэ

Сэрэгэй тусхай операцида хабаадагшадые хүтэлбэрилхы тушаалда бэлдэжэ, гүрэнэй ба нютагай засагта, гүрэнэй компанинуудта ажалтай болгохо, ниигэмэй удха шанартай түсэлнүүдтэ хабаадуулха үүргэтэй «Баатарнуудай саг» программа үнгэрэгшэ жэлдэ  бэелүүлэгдэжэ эхилээ һэн.

2024 оной февралиин 29-дэ Россиин Юрэнхылэгшэ Владимир Путин Федеральна Суглаанда хандалга эльгээхэ үедөө сэрэгэй тусхай үйлэ хэрэгүүдтэ хабаадагшадай, ветерануудай элдэб һалбаринуудта хүтэлбэрилхы тушаал эзэлхэ талаар программа байгуулха үүсхэл гаргаһан юм.

 - Мэдэнэ гүт, “эрхим түлөөлэгшэд” (элита) гэжэ үгэ олониитын урда ямаршье габьяагүй зондо хабаатай бэшэ. Урда жэлнүүдтэ, 90-ээд онуудай үедэ, экономикодо болоһон элдэб үйлэ хэрэгүүдэй ашаар хармаанаа дүүргэһэн зон эрхим түлөөлэгшэд бэшэ. Эдэ зон онсо эрхэтэй, дээгүүр гарай эрхэтэдбди гэжэ бэеэ тоолодог. Росси гүрэндөө алба хэжэ, шалгалта гараһан, Эхэ орондоо бэеэ үгэн, үнэн сэдьхэлһээ дурлалаа гэршэлһэн  зон, сэрэгшэд ба ажалшад бодото дээрээ эрхим түлөөлэгшэд гээшэ. Тиимэһээ 2024 оной мартын 1-һээ сэрэгэй тусхай үйлэ хэрэгүүдэй ветеранууд, мүнөө дайлалдажа ябаһан сэрэгшэд «Баатарнуудай саг» гэһэн тусхай программада хабаадаха аргатай. Энэ программа «Россиин түрүүшүүл» конкурсын, гүрэнэй хүтэлбэриин дээдэ һургуулиин хэбээр байгуулагдаха. Дүүргэгшэдынь олон һалбаринуудта үндэр тушаалнуудые эзэлдэг, сайдууд ба нютаг можын хүтэлбэрилэгшэдшье болодог, - гэжэ Россиин Юрэнхылэгшэ хэлэһэн байна.
Холбоото уласай программын 1-дэхи ээлжээндэ 83 хабаадагшад шэлэгдээ һэн. Тэдэ 2024 оной майн 27-до һуралсалаа эхилээ. Программын түрүүшын ээлжээндэ “Россиин Баатар” гэһэн үндэр нэрэ зэргэтэй 21 хүн һураа. Программа бэелүүлгын үедэ 1-дэхи ээлжээнэй 27 хүн тушаалнуудта дэбжүүлэгдээ.

Жэлэй туршада үргэлжэлһэн һуралсалай үедэ хабаадагшад гүрэнэй политикада ба гүрэнэй хүтэлбэриин системэдэ, эдэй засагта, гүрэнэй мүнгэн һанда, хүрэнгэжүүлгэдэ зорюулагдаһан болбосоролой хоёр модуль шудалаа. Тиихэдэ Сахалинай ба Нижегородско можонуудта стажировко гараа, Хойто полюс хүрэтэр атомно ледоколоор ошоо. Россиин Юрэнхылэгшын Захиргаанай түлөөлэгшэд, Ородой Холбоото Уласай Засагай газарай гэшүүд, холбоото уласай эмхи зургаануудай хүтэлбэрилэгшэд, нютаг можонуудай толгойлогшонор программа хүтэлэн ябуулаа. Хабаадагшад стажировкын үедэ онлайн гуримаар һуралсалаа үргэлжэлүүлээ, дүршэлтэй багшанарай хүтэлбэри доро эрдэм мэдэсэеэ хэрэглэхэ арга боломжодо хүртөө. 1-дэхи ээлжээндэ хабаадагшад Ородой Холбоото Уласай Юрэнхылэгшын Захиргаанда, Оросой Холбоото Уласай Засагай газарта, Федерациин Зүблэлдэ, Гүрэнэй Дүүмэдэ, нютаг можонуудай засагай газарта, холбоото уласай яамануудта ба гүрэнэй корпорацинуудта стажировко гараа.

Программа эдэбхитэйгээр бэелүүлэгдэнэ. Мүнөө хабаадагшадые шэлэн абалга үргэлжэлһөөр. Тэрэнэй дүнгүүдээр 2-дохи ээлжээндэ хабаадагшадые бүридхэхэ юм. Үнгэрэгшэ жэлдэ сэрэгэй тусхай операцида хабаадаһан 65 хүн мэдүүлгэ эльгээһэн байна. 

Владимир Путин 2024 оной декабрь һарада үнгэргэгдэһэн «Единая Россия» намай сьезддэ «Баатарнуудай саг» программа нютаг можонуудта бэелүүлхэ тухай мэдээсээ һэн. Буряад Уласта эхиеэ абаһан программа «Буряадай патриодууд» гэжэ нэрлэгдээ. Тус программада хабаадахын тула ПАТРИОТЫБУРЯТИИ.РФ сайтда орожо, анкетын асуудалнуудта харюусаха хэрэгтэй. Мэдүүлгэнүүд байгша оной мартын 28 болотор абтаха.