Буряадай Нижнеангарск, Таксимо һууринуудта аэропортнууд һэльбэн шэнэлэгдэхэ

Энээн тухай мартын 7-до үнгэргэгдэһэн пресс-клубай үедэ Буряад Уласай Унаа тээбэри, элшэ хүсэ ба харгын ажахы хүгжѳѳлгын талаар сайд Александр Гоге мэдээсэбэ. Үндэһэтэнэй «Аша үрэтэй унаа тээбэриин системэ» түсэлөөр энэ хэрэгтэ табан миллиардһаа үлүү мүнгэн зөөри хараалагданхай.

- Мүнөө заһабарилга хэхэ эмхинүүдые элирүүлээбди. Ниидэлгын ба агаарай онгосын бууха зурууд булта холбоото уласай мэдэлдэ байна. Холбоото уласай мүнгэн зөөреэр заһабарилга хангахын тула тэдэниие март һарын дүүрэтэр уласай хэмжээндэ оруулха ёһотойбди. Тэрэнэй удаа түһөө түсэб зохёолгын саарһа дансануудые бэлдэжэ эхилхэбди. Барилгын ажалнууд 2027 ондо эхилхэ гэжэ Александр Гоге хөөрэбэ.
Һаяын сагта «Байгал» гэжэ уласхоорондын аэропортын агаарай онгосонуудай байдаг перроной хуби һэльбэн шэнэлхэ талаар данса бэлдэжэ эхилхэбди гэжэ Буряад Уласай Унаа тээбэри, элшэ хүсэ ба харгын ажахы хүгжѳѳлгын талаар сайд мүн мэдээсээ. Жэл бүри онгосоор ниидэгшэдэй тоо 15-20 мянган хүнөөр дээшэлнэ, тиимэһээ агаарай онгосын талмайнууд дуталдажа болохо. Һэльбэн шэнэлэлгэ гүрэнэй ба үмсын хүсөөр бэелүүлэгдэхэ.