163
Улаан-Үдэ ба Северобайкальск хотонуудта коммунальна ажахын шэнэлэлгэ эхилхэ
2025 ондо үндэһэтэнэй шэнэ түсэлэй хэмжээндэ энэ ажал ябуулагдаха
Буряад Уласай Барилгын ба гэр байрын ажахы шэнэлэлгын сайдай орлогшо Евгений Поляковой мэдээсэһээр, 2025 ондо үндэһэтэнэй «Ажамидарал хангамжын ажахы» түсэлэй «Коммунальна ажахы һэльбэн шэнэлэлгэ» гэһэн холбоото уласай шэнэ түсэл бэелүүлэгдэжэ эхилхэ. Энээн тухай мартын 7-до үнгэргэгдэһэн пресс-клубта сайдай орлогшо мэдээсэбэ. Улаан-Үдэ, Северобайкальск хотонуудай мастер-түсэбүүдтэй һэльбэн шэнэлэлгэ холбоотой. Россиин Барилгын ба гэр байрын ажахы шэнэлэлгын яаман шэнэ түсэлэй хэмжээндэ 2025 – 2027 онуудта мүнгэн зөөри һомолхоор түсэблөө. Энэ мүнгөөр коммунальна ажахын объектнүүд баригдаха, һэльбэн шэнэлэгдэхэ, тиихэдэ инженернэ һужаанууд һэлгэгдэхэ.
- 2025 ондо 507 сая түхэриг һомологдожо, 2 түсэл бэелүүлэгдэхэ. Улаан-Үдэ хотодо 417 сая түхэригэй ажал ябуулагдаха, Северобайкальскын дулаагаар ба уһаар хангадаг һужаануудай заһабарилгада 88 сая түхэриг гаргашалагдаха. Энэ хадаа манай түсэбэй багахан хубинь болоно,- гэжэ Евгений Поляков тэмдэглээ.
Сайдай орлогшын хэлэһээр, 2030 он болотор 1 млрд 700 сая түхэриг һэльбэн шэнэлэлгын хүдэлмэринүүдтэ шэглүүлэгдэхэ.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
