2024 ондо Улаан-Үдын ЛВРЗ олон электровозуудые заһабарилаа

Алексей Цыденов механическа цех хүрэжэ, шэнэ түхеэрэлгэнүүдые, заводой гаргадаг продукциин үзэсхэлэн хараа.

- Заводто боложо байһан һэлгэлтэнүүдые тэмдэглэхэ дуран хүрэнэ. Үнгэрэгшэ жэлдэ завод мянга гаран секци заһабарилаа, ажалай хэмжээгээр энэ дээдэ зэргын ээлжээтэ амжалта болоно. Совет үедэ 660 секци хэгдэдэг байгаа. Мүнөө заводто һэльбэн шэнэлэлгэ боложо байна, шэнэ станогууд абтаа, шэнэ продукци гаргагдана. Урдань Украинада бүтээгдэдэг хэрэгсэлнүүд Россиин заһабарилгын системэ хангалсадаг байһан һаа, мүнөө ЛВРЗ энэ үүргэ дүүргэнэ. Үйлэдбэриин хүгжэлтэ үргэлжэлһөөр. Манай омогорхол болохо заводто ажалай амжалта, шэнэлэлгэ, коллективтэ һайн һайханиие хүсэнэб, - гэжэ Алексей Цыденов хэлэбэ.

 Улаан-Үдын ЛВРЗ Россиин томо үйлэдбэринүүдэй нэгэн болоно. 2023 ондо эндэ 955 секци, 2024 ондо 1002 секци заһабарилагдаа. Гадна худалдаа наймаанай захилаар 4 секци бүтээгдээ. Завод Алас Дурнын тойрогой, Восточно полигоной локомотивуудые заһабарилдаг, һэльбэн шэнэлдэг, Россиин түмэр харгы хэрэгсэлнүүдээр хангадаг. Үйлэдбэридэ 4800 гаран хүн хүдэлнэ, дунда зэргын салин 90, 6 мянган түхэриг.

- 2025 ондо завод тэрэл хэмжээгээр ажалаа ябуулха. Заводой хүгжэлтэ үргэлжэлһөөр. Олон зорилго бидэндэ табигданхай, мүнөө жэлэй туршада байшануудаа заһабарилхабди, үйлэдбэриин талмайнуудта шэнэ түхеэрэлгэнүүдые тодхохобди. Хоёр млрд түхэриг ашаглаха ёһотойбди. Улаан-Үдэ хотын болбосоролой эмхи зургаануудтай хэлсээтэй хүдэлнэбди, ниигэмэй өөрын һалбари хүгжөөнэбди. Бүхы ажал заводой, Буряад Уласай, Россиин түлөө, - гэжэ Улаан-Үдын ЛВРЗ-н захирал тэмдэглэбэ.