Буряадай Толгойлогшо ЛВРЗ-дэ хүдэлдэг эхэнэрнүүдые мартын 8-ай һайндэрөөр амаршалба

Мартын 7-до Буряад Уласай Толгойлогшо Алексей Цыденов Улаан-Үдын ЛВРЗ албанай хэрэгээр хүрэхэ зуураа, эндэ хүдэлдэг эхэнэрнүүдые һайндэрөөр  амаршалба.

- Хүндэтэ манай эхэнэрнүүд! Мартын 8 эгээл гоё һайндэр. Энэ үдэр эхэнэрнүүд ажал хэрэгүүд тухай бэшэ, харин өөр тухайгаа нэгэ бага бододог. Өөр тухайгаа бододог байгты, бэеэ анхарагты. ЛВРЗ гэһэн үйлэдбэридэ хүдэлхэнь тиимэшье бэлэн бэшэ. Эндэ аяар 1500-аад эхэнэрнүүд хүдэлжэ байна. Таанадые сэдьхэлэй гүнһөө амаршалаад, бэеын энхэ элүүрые, зол жаргал хүсэнэб. Эхэнэрнүүд манай ажабайдал удха шанараар дүүргэдэг, - гэжэ Буряад Уласай Толгойлогшо тэмдэглэбэ.

Алексей Цыденов заводой хүгжэлтэдэ хубитаяа оруулһан, шударгы ажалаараа шалгарһан эхэнэрнүүдтэ шангуудые барюулба. «Буряад Уласай үмэнэ габьяагай түлөө» медаляар түсэблэлгын ба бюджедэй таһагай даргын орлогшо Ирина Рыжова, дефектоскопист Нина Скуратова, заводой ветеран Светлана Гришина  гэгшэд шагнагдаа.

Буряад Уласай Хүндэлэлэй грамота заводой захиралай орлогшын уялга саг зуура дүүргэгшэ Наталья Канайкинада, слесарь-электрик Анна Гадецкаяда барюулагдаа. Инженер Татьяна Черных, шэрдээшэн Наталья Колбина, инженер Ольга Васюк,  кранай машинист Анастасия Рупышева Буряад Уласай Толгойлогшын баярай бэшэгүүдээр урмашуулагдаа. Харин Буряад Уласай Толгойлогшын захиргаанай баярай бэшэгүүдээр Екатерина Димова, Ольга Михайлова гэгшэд шагнагдаба. Буряад Уласай Арадай Хуралай, Буряад Уласай Үйлэдбэриин, худалдаа наймаанай ба хүрэнгэжүүлгын яаманай, Буряад Уласай Унаа тээбэри, элшэ хүсэ ба харгын ажахы хүгжѳѳлгын талаар яаманай баярай бэшэгүүд шалгарагшадта мүн барюулагдаа.