289
Мартын 8-да Алексей Цыденов ажалай ветеран Клавдия Федоровае Эхэнэрнүүдэй уласхоорондын үдэрөөр амаршалба. Мүнөө жэлдэ ажалай ветеран 98 наһатай болобо.
- Мартын 8-най һайндэрөөр таниие амаршалнаб! Та манай омогорхол болонот. Танай ажабайдал баяраар дүүрэн, жаргалтай байхань болтогой. Үри хүүгэдэйнгөө дулаахан дүхэригтэ олон жэлдэ элүүр энхэ һуугыт даа, - гэжэ Алексей Цыденов амаршалба.
Клавдия Ивановна Федорова 1927 оной сентябриин 23-да Курск хотодо түрэһэн намтартай. 1934 ондо гэртэхинтэеэ Улаан-Үдэ зөөжэ ерээ. Агууехэ Эсэгын дайнай эхиндэ почтальоноор хүдэлөө, удаань хилээмэ болгодог заводто ажалда ороо. 1948 ондо Клавдия Ивановна наһанайнгаа нүхэртэй танилсаһан байна. Дайнай ветеран Федос Архипович Федоров 1946 ондо фронтһоо бусажа ерээ һэн. Дайнһаа тэрэ шархатай бусаһан юм. Һайн болоходоо, Федос Архипович ПВЗ-н литейнэ цехтэ ажаллажа эхилээ. Удаань Клавдия Ивановна энэл цехтэ ажалда ороо бэлэй. Наһанайнгаа амаралтада гараад, 13 жэлэй туршада аппаратна цехтэ хүдэлһэн намтартай. Ажалай ветеран дүн хамта 46 жэлэй стажтай, тиихэдэ ПВЗ-дэ 36 жэлэй туршада хүдэлөө. Наһанайнгаа нүхэртэй 4 үхибүүдые хүмүүжүүлээ. Наталья Федосовна басаганиинь ЛВРЗ-дэ, 2-дохи басаган Татьяна Федосовна Приборостроительна заводто хүдэлөө. Геннадий Федосович хүбүүниинь ЛВРЗ-н ажалшан, бага хүбүүн Виктор Федосович Ростов хотодо ажаһуудаг, судостроительна заводто хүдэлһэн юм. Мүнөөдэр Клавдия Ивановна 9 аша зээнэртэй, 13 гуша зээнсэртэй. Тэрэ «Агууехэ Эсэгын дайгда илалтын түлөө» медаляар, олон тоото грамотануудаар, баярай бэшэгүүдээр шагнагданхай. Мүнөөдэр ажалай ветеран Оксана Валерьевна аша басагантаяа ажаһуудаг.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
