Юрий Трутнев сэрэгэй тусхай үйлэ хэрэгүүдһээ бусаһан сэрэгшэдтэй уулзаба

Ородой Холбоото Уласай Засагай газарай Түрүүлэгшын орлогшо - Алас Дурнын тойрогоор Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутнев Эхэ ороноо хамгаалха уялгаяа дүүргэжэ, гэртээ бусаһан һайн дуратанай отрядтай - Алас Дурнын тойрогой нютаг можонуудта гүрэнэй алба хаагшадтай уулзаба.

Отряд хахад жэлэй саана бүридхэгдэһэн байна. Тэрэниие бүридхэхын тула табан һарын туршада ажал ябуулагдаа. Алас Дурнын тойрогоор Ородой Холбоото Уласай Юрэнхылэгшын бүрин эрхэтэ түлөөлэгшын аппарадай, Россиин Зүүн зүгые хүгжөөлгын яаманай мэргэжэлтэд, Алас Дурнын тойрогой юһэн нютаг можонуудай ажалшад (Буряад Улас – 2, Яхад – 4, Үбэр Байгал– 3, Камчатка – 2, Примори – 2, Хабаровскын хизаар – 1, Сахалинай можо– 3, Еврейн автономито тойрог – 2, Чукотка – 3), дүн хамта 27 хүн отрядай бүридэлдэ ороһон байна. Һайн дуратан Курска ба Донецкэ шэглэлнүүдээр ВСУ-гэй хүсэ шадал, түхеэрэлгэнүүдые элирүүлгын тагнуулда ябаа, хүтэлэгшэгүйгөөр ниидэдэг аппарадуудаар хүдэлөө. Тэдэ булта Россиин Хамгаалгын яаманай «Сэрэгэй тусхай үйлэ хэрэгүүдтэ хабаадагшада» медаляар шагнагдаа, харин Курска бүлгэмэй гэшүүдтэ (21 хүндэ) үшөө «Курска можо хамгаалагша» гэжэ медаль барюулагдаа.

- Дайшалхы үйлэ хэрэгүүдэй газар тээшэ ошохо шиидхэбэри абаһан таанадта баяр хүргэнэб. Ами наһанда аюултай зорилгонуудые эрхимээр дүүргэжэ шадаат. Танай хэһэн хэрэг мартагдахагүй, бидэнэй хамта ябуулжа байһан ажалай тон хэрэгтэй, шухала байһые ойлгожо абаат, бэе дээрээ үзөөт. Зан абаритнай нэгэ бага шэрүүн боложо магад, энэ гайхалгүй. Мүнөөдэр таанад Эхэ ороноо хамгаалагшадай тоодо ороот. Гүрэн түрэ, танай бүлэнүүдэй гэшүүд энээниие мартахагүй. Һайнта даа, доро дохин баяр хүргэнэб, - гэжэ Юрий Трутнев хэлэбэ.

Сэрэгэй бэшэ зониие хамгаалгын ба онсо ушаралта байдалай, олониитын аюулгүйн хорооной түрүүлэгшын орлогшо - Улаан-Үдэ хото сэрэгэй бэшэ талаар хамгаалгын хүтэлбэриин дарга, аэро-тагнуулай бүлгэмэй оператор Дмитрий Фёдоровой тэмдэглэһээр, отряд Алас Дурнын тойрогой түлөөлэгшэдһөө бүридхэгдөө. Гүрэнэй алба хаагшад ганса кабинет соо шиидхэбэри абажа шадаха бэшэ, харин Эхэ ороноо хамгаалхын тула сэрэгэй тусхай үйлэ хэрэгүүдтэ  ямаршье сагта ошохо бэлэн байһанаа гэршэлээ гэжэ тэрэ хэлэбэ.

Сэрэгэй  шэглэлээр продукци гаргадаг үйлэдбэринүүдые һэльбэн шэнэлхэ, үргэдхэхэ талаар «Патриотическая» гэжэ нэрлэгдэһэн уридшалан хүгжөөлгын дэбисхэр байгуулагдаа һэн. Энээн тухай Ородой Холбоото Уласай Засагай газарай Түрүүлэгшын орлогшо - Алас Дурнын тойрогоор Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутнев хөөрэбэ.

 «FPV-дронуудые, хүтэлэгшэгүйгөөр ниидэдэг аппарадуудые, радиоэлектронно тэмсээнэй ба тагнуулай хэрэгсэлнүүдые, бронежиледүүдые, саһан ба намаг соогуур ябадаг машинануудые, шуһа тогтоодог турникедүүдые болон бэшэшье продукци гаргадаг Алас Дурнын тойрогой 26 үйлэдбэри дэмжэлгэ абана. Бүхы продукци шалгалта, туршалга гарадаг. 2023-2024 онуудта 22,5 мянган бүтээл сэрэгэй тусхай операцида эльгээгдээ, үшөө 13 мянганиинь эльгээгдэхэеэ байна. 2025 оной түрүүшын 3 һарын туршада 27000 бүтээл үйлэдбэрилжэ, фронт руу һаяын сагта эльгээхэбди, - гэжэ Юрий Трутнев тодорхойлоо.

Һайн дуратан Эхэ орондоо алба хэжэ, сэрэгэй тусхай операциин үедэ эрэлхэг зориг харуулаа, олондо жэшээ болоо. Россиин Засагай газарай Түрүүлэгшын орлогшо баярай бэшэгүүдээр тэдэниие урмашуулаа. Сэрэгэй тусхай үйлэ хэрэгүүдтэ хабаадаһан гүрэнэй албатад Юрий Трутневта, Алас Дурнын тойрогоор Ородой Холбоото Уласай Юрэнхылэгшын бүрин эрхэтэ түлөөлэгшын аппарадта, Россиин Зүүн зүгые хүгжөөлгын яаманда, Алас Дурнын тойрогой нютаг можонуудта туһа хүргэжэ,  дэмжэжэ байһанайнь түлөө баяр хүргэбэ. Мүн Россиин Засагай Түрүүлэгшын орлогшодо ВСУ-гэй трофейнэ дрон, отрядай бүхы гэшүүдэй гар табилгатай Илалтын туг дамжуулаа.