Буряад Уласта 23 залуу бүлэ гүрэнэй программаар гэр байра абаха үнэмшэлгэтэй  болобо

Мартын 11-дэ «Россиин эрхэтэдые гэр байраар ба коммунальна туһаламжануудаар хангалга» гэһэн гүрэнэй программаар залуу бүлэнүүдтэ гэр байра худалдажа абаха (бариха) үнэмшэлгэнүүд баярай оршон байдалда барюулагдаба.

Үнэмшэлгэнүүдые Буряад Уласай Толгойлогшо Алексей Цыденов барюулаа.

- Иимэ олон үхибүүдые хаража байхада гоё байна. Олон хүүгэдтэй бүлэнүүд манай улас, манай гүрэн хүгжэжэ, улам баян боложо байһые гэршэлнэ. Мүнөөдэр эндэ сугларагшадые амаршалнаб. Гэр байра абаха тэдхэмжын үнэмшэлгэнүүдые барюулжа байхада хэды гоёб даа. 2016 онһоо хойшо 1000 гаран бүлэ иимэ үнэмшэлгэтэй болоо. Мүнөө жэлдэ 85 бүлэ үмсэдөө гэр байратай болохо, гүрэнэй талаһаа дэмжэлгэдэ тэдэ хүртэбэ, - гэжэ Алексей Цыденов тэмдэглээ.

2016- 2024 онуудта 1064 залуу бүлэ ниигэмэй түлбэридэ хүртөө. Энэ хэрэгтэ 739,0 сая түхэриг һомологдоһон байна. Энэ жэлдэ 81,7 сая түхэриг шэглүүлэгдэбэ.