Сэдьхэл зүрхыемнай баясуулаа

Соёлой яаманай дэргэдэхи РЦНТ-гэй шэмэглэн-гоёолгын ис­кусствын талаар таһагые даагша Эржена Цыдыпова тэмдэглэхэдээ, эндэ бэрхэ-бэрхэ дархашуулай, тэрэ тоодо Зоригто Жамбаловай мүнгөөр хэһэн хэрэгсэлнүүд, эхэнэрнүүдэй гоёолтонууд табигдаба гэжэ онсолбо.

Буряад орондоо мэдээжэ болоһон һайн дуранай бо­лон мэргэжэлтэ артистнууд бэлиг талаангаа харуулба, харагшадай халуун альга ташалгада хүртэбэ. Буряад арадаймнай уран бэлиг­тэ, баян ёһо заншалнуудта һанаашархаһан, баялигы­ень үгы болгохоёо һэдэһэн шолмос угтай Хара шубуун­да Буряад ороноймнай баатарнууд – Эхирэд, Булагад, Хонгоодор, Хори, Сонгоол, Сартуул баатарнууд Ородой баатартай хамта эсэргүүсэн добтолһыень үльгэрэй үзэгдэлнүүд тайзан дээрэ гэр­шэлнэ. Хэды тиигэбэшье һаань, алдар суута “Байгал” театр, “Байгалай долгинууд”, “Булжамуур”, “Лотос”, ород, шэмээшэг, хасаг бо­лон оротоной ансамбльнууд аргагүй бэрхээр хатарба, суг нэгэ үдэр соо эбтэй эетэй- гээр үнгэржэ байһан Сагаалганай болон Масленицын һайндэрнүүдые дэмжэбэ, хани барисаанай хүсэ шада­лые харуулба. Бэлигтэй дуу­шад Бадма-Ханда Аюшеева, Чингис Раднаев, Зорикто бо­лон Нонна Тогочиевтан, Дул­ма Сунрапова, Сэсэг Аюшее­ва, Дарима Цырендондопо­ва болон бусад дуушаднай бэлэг дуугаа барижа, эндэ сугларагшадые баясуулһан байна. «Русские не сдаются, буряты не бегут» гэһэн дуу Тимур Болотов геройнуудта зорюулба.

Амаршалгын үгэнүүд - амгалан байдалай түлөө

Түрэл уласаймнай дар­ганар тайзан дээрэ гара­жа, үреэлэй дээжые, һайн һайханиие эндэ сугларһан зондоо, үнгэрһэн жэлдэ шалгарһан эрхим хүнүүдтэ, эбтэй эетэй, бэлигтэй бэрхэ гэр бүлэнүүдтэ хүсэбэ. Буряад Уласаймнай Толгойлог­шо Алексей Цыденов иигэ­жэ тэмдэглээ: «Манай ажа­байдалда ходол һайн үйлэ хэрэгүүд боложо байг, бидэ ямаршье дуудалга, дабаануудые дабажа байхамнай бол­тогой! Хододоо манай уласта, манай гүрэндэ һайхан сэдьхэлтэй, залуу үетэн мүндэлхэнь болтогой! Сагаан һараар, Сагаалганаар!».

Буряад Уласай Арадай Хуралай Түрүүлэгшэ Влади­мир Павлов Сагаалганайн­гаа мэндэ хүргэбэ: “...Иланга­яа бидэ манай сэрэгшэдые болон тэдэнэй бүлэнүүдые халуунаар амаршалнабди! Маани, мэгзэмүүднай дайгаа дараха хэрэгтэмнай, Илал­тадамнай манай нютагаар­хидта туһалаг лэ, тиин тэдэм­най дайгаа даража, даагаа һүүлдэжэ, гэртээ элүүр энхэ, амиды мэндэ бусахань бол­тогой!”.

Улаан-Үдын Депутадуу- дай соведэй түрүүлэгшэ, Бүгэдэ Буряадай үндэһэн соёлой эблэлэй түрүүлэгшэ Чимит Бальжинимаев амар­шална: “...Үндэһэн буряад хубсаһаяа хододоо үмдэхэл байгаабди даа. Бэе бэедээ һайхан, дулаан үгэнүүдые хэлэжэ, түрэл хэлэеэ үзэхэ ёһотойбди, среда бүхэндэ буряадаар хөөрэлдэе, ара­дайнгаа ёһо заншалые дэл- гэрүүлэе”.

Удаань түрэл уласаймнай эрхим зондо Буряад Уласай Гүрэнэй шангууд даргана­рай зүгһөө барюулагдаба. Литературын оршондо суута поэт Санжи-Сурун (Гали­на) Раднаева шагнагдаба. Харин “Эреэхэн” гэһэн опе­ро бүтээһэн композитор Баир Дондоков түрүүтэй бүлэгэйхид шагналнуудта хүртөө. Буряадайнгаа искус­ство болон литература дээ­рэ илгарагшад гэхэдэ, алдар суута артистнууд, уран бэ­лигтэн – түрэл театртаяа са­суу наһатай Георгий Бутуха­нов, баледэй мэдээжэ артист Виктор Ганженко, драматург Степан Лобозёров, режис­сёр Анатолий Баскаков гэг­шэд шангуудые халуун альга ташалган доро абаба.

Буряад ороной Толгой­логшо, Эрхүүгэй можын, За­байкалиин хизаарай, Тыва Республикын болон Хальмаг Республикын Гулваа хоорон­доо телемост – сэхэ дамжуул­га үнгэргөө, бэе бэеэ амар­шалаа.

ФСК-гай фойе соо Сагаан һарын бэлэгүүд дэлгээгдээ, эндэ һайхан угал­затай амһарта, табагууд, гоё буряад зурагууд, гоёолто зүүдхэлнүүд олоной анхарал татаа. Сэдьхэлээ тоглолтоор, яармаг-харалгаар ханааһан, баясаһан зон гэртээ ехэ ба­яртайнууд бусана һэн даа.