214
Эхэнэрнүүдэй уласхоорондын һайндэр угтуулан Ородой Холбоото Уласай бүхы можо нютагуудта «Геройнуудай эжынэртэ баглаа сэсэгүүд» гэһэн акци үнгэргэгдөө. Тус хэмжээ ябуулга сэрэгэй тусхай операцида хабаадажа байһан, ами наһаяа алдаһан сэрэгшэдэй эжынэрые дэмжэхэ зорилготойгоор «Единая Россия» намай эхэнэрнүүдэй хүдэлөөн» эмхидхэнэ. Энэ акциин һүлдэ хадаа алтан зула сэсэг болоно. Тиигэжэ эжынэртэ баяр хүргэжэ, анхаралаа хандуулжа, хэзээдэшье туһа хүргэхөөр бэлэн байһанаа мэдүүлжэ баглаа сэсэгүүд барюулагдана.
Буряадай ниислэл хотодошье энэ акциин хэмжээндэ «Эхэнэр хүн – Геройн нангин һахюуһан» («Женщина – Ангел-Хранитель Героя») гэһэн тоглолто мартын 6-да Хүүгэдэй, эдиршүүлэй уран бэлигэй ордондо үнгэрөө. Энэ тоглолтодо сэрэгэй тусхай операцида хабаадажа байһан, баатарай үхэлөөр унаһан сэрэгшэдэй эжынэр, наһанайнь нүхэд – дүн хамта 250-һаа дээшэ хүн ерэһэн байна.
- Бидэ мүнөөдэр энэ тоглолто сэрэгэй тусхай операцида хабаадажа байһан сэрэгшэдэй эжынэр, хани нүхэд, эгэшэ дүүнэр, басагадтаньшье, тиихэдэ голхортойнь гэхэдэ, хүбүүгээ, нүхэрөө алдаһан эжынэртэ энэ тоглолто бэлдээбди. Бидэнэй энэ тоглолто хаража, хабарай ерэһэндэ баярлажа байхымнай түлөө хүбүүднай мүнөөшье байлдаануудта хабаадажа байна.
Эсэгэ ороноо эрэлхэг зоригтойгоор хамгаалхаа ошоһон хүбүүдэйнь, инаг хайратануудайнь түлөө бидэ энэ тоглолтоороо баяраа мэдүүлжэ, доро дохинобди, - гэжэ «Единая Россия» намай эхэнэрнүүдэй хүдэлөөн» гэһэн федеральна түсэлэй уласай залан хүтэлбэрилэгшэ, Буряад Уласай Арадай Хуралай Түрүүлэгшын орлогшо Татьяна Мантатова хэлэбэ.
Хүүгэдэй зохёохы бүлгэмүүд энэ тоглолтодо харюусалгатайгаар бэлдэһэн байна. Бүхэроссиин болон уласхоорондын мүрысөөнүүдэй лауреадууд, жэшээтэ «Саран Туя», «Потешки» болон бусад ансамбльнууд гоё һайхан концерт харуулаа. Энэ үдэшэ тэдэнэр дайн дажаргүй, зүрилдөөгүй ерээдүй мандаха байха гэһэн найдал түрүүлжэ, уярма оршондо тоглолто үнгэрбэ.
- Эсэгэ ороноо хамгаалагшадай эжынэр, инаг хайрата нүхэд, эгэшэ дүүнэртэ баяр баясхаланаа мэдүүлнэбди. Таанад гал гуламтаяа нангинаар сахижа, манай Баатарнуудай түшэг тулгуури болонот, - гэһэн үгэнүүдые Буряадай Толгойлогшын зүгһөө «Единая Россия» намай уласай таһагай гүйсэдхэхы хорооной хүтэлбэрилэгшэ Владимир Ведерников дамжуулаа.
Тоглолтын үдэшэ Буряад Уласай Толгойлогшо Алексей Цыденовэй зүгһөө сэсэгүүд болон амаршалганууд барюулагдаа.
Хүбүүдээ алдаһан эжынэр, нүхэрөө алдаһан ханинар, аха дүүгээ алдаһан абгайнар хэдышье уйдхар гашуудалда абтабашье, нэрьемэ халуун альгаар ташалгаар тайзан дээрэ гараһан эдиршүүлые угтажа абана. Бэлиг талаантай үхибүүдые хаража, байлдаанда ябаһан хүбүүдэйнгээ түлөө үдэр һүнигүй маани мэгзэмээ уншажа, зальбаржа ябаһан эжынэрэй, эгэшэ дүүнэрэй зүрхэ сэдьхэлдэ шуһата байлдаан дүүрэхэ гэһэн найдал түрэнэ. Баатар сэрэгшэднай амиды мэндэ дайгаа даража бусаг лэ даа гэһэн бодол хүн бүхэнэй толгойдо, һанаанда.
- Эхэ ороноо хамгаалха минии уялга гэжэ хэлээд хүбүүмни ошоо. Үдэр һүнигүй, үргэһэ нойроо мартажа зальбарнаб, сүмэ, дасаншье ябанаб, хии морииень хиидхүүлнэб. Хэзээшье дүүрэхэ юм даа, - гэжэ сэрэгэй тусхай операцида хабаадажа байһан 21-тэй сэрэгшын эжын Елена Красавина хэлэнэ.
Буряад Уласай Арадай Хуралай ниигэмэй бодолгын талаар хорооной хүтэлбэрилэгшэ Игорь Марковец амаршалгын үгэдөө иигэжэ хэлэһэн байна:
- Таанар эрэ хүнэй өөрыгөө хада уула мэтээр һанахаар ганса үгөөрөө дэмжэхэ шэдитэйт. Энэ хүсэн танда байгаалиһаа үгтэнхэй, танай сэдьхэлһээ гарана, хододоо энэ хүсэнтнай тандаа байг.
Нээрээшье, ямарайшье сагта бүһэтэйшүүлөө далижуулжа, гуламтынгаа гал бадаруулжа, үри хүүгэдөө хүмүүжүүлжэ, нүхэрэйнгөө түшэг тулгуури боложо ябадаг эхэнэрнүүдтэ - алдар соло.
