Буряад Уласта «Гэр байра ба хотын оршон» гэһэн үндэһэтэнэй түсэлөөр гэрнүүд баригдана

Энээн тухай Буряад Уласай Барилгын ба гэр байрын ажахы шэнэлэлгын сайдай уялга саг зуура дүүргэгшэ Евгений Коркин «Шухала юумэн тухай сэхэ руунь» гэжэ пресс-клубай үедэ мэдээсэбэ. Пресс-клубта «Амидаралай хангамжын ажахы: бэелүүлгэ, дүнгүүд, түсэбүүд» гэһэн сэдэбээр хөөрэлдөөн болоо.

– Буряад Уласта «Гэр байра ба хотын оршон» гэжэ үндэһэтэнэй түсэлэй хэмжээндэ  2019 онһоо 2024 он болотор 2 сая 112,5 мянган хоёролжон метр талматай гэр байра ашаглалда тушаагдаа, тэрэ тоодо 560 мянган хоёролжон метр талмайтай байра олон квартиратай гэрнүүдтэ. 2023 ба 2024 онуудта манай уласта гэр байра ашаглалда тушааха талаар түсэб тус тустаа 64 ба 59 хубяар дүүргэгдээ. Хангамжын ажахы байгуулга, ипотечнэ урьһаламжын хүнгэлэлтэнүүд, эрхэтэдэй мүнгэн зөөри хамгаалха үүргэтэй эскроу счёт хэрэглэлгэ барилгын ургалгада нүлөөлөө, - гэжэ Евгений Коркин тэмдэглээ.

«Алас Дурнын ипотекэ» программаар 2019 онһоо мүнөөдэр болотор Буряад Уласта 57,66 млрд түхэригэй 14 403 хэлсээн баталагдаа.

Һандарһан гэрнүүдһээ эрхэтэдые зөөлгэхэ уласай программаар, холбоото уласай «Гэр байрын жасын һандарһан гэрнүүдые үсөөлэлгэ» түсэлөөр Закаменск, Северобайкальск, Улаан-Үдэ, Бабушкин, Гусиноозёрск хотонуудта, Каменск, Селенгинск тосхонуудта олон байратай гэрнүүд баригдаа.

- 2019- 2024 онуудта 6,8 мянган эрхэтэд зөөлгэгдөө. Тиигэжэ 98,39 мянган хоёролжон метр тайлмайтай аюултай болоһон гэрнүүд сүлөөлэгдөө, - гэжэ Буряад Уласай Барилгын ба гэр байрын ажахы шэнэлэлгын сайдай уялга саг зуура дүүргэгшэ Евгений Коркин онсолбо.