Буряад Уласта юһэн хүүргын барилга түсэблэгдэнэ

Энээн тухай Буряад Уласай Унаа тээбэри, элшэ хүсэ ба харгын ажахы хүгжѳѳлгын талаар сайд Александр Гоге «Шухала юумэн тухай сэхэ руунь» гэһэн пресс-клубай үедэ мэдээсэбэ. Пресс-клубта «Амидаралай хангамжын ажахы: бэелүүлгэ, дүнгүүд, түсэбүүд» гэһэн сэдэбээр хөөрэлдөөн болоо.

Улаан-Үдэдэ Шэтын түмэр харгын гараса һэльбэн шэнэлэгдэхэ. Тэндэхи харгы ехэ уйтан юм, саашадаа тэрэ баригдажа байһан 3-дахи «Талаан» гэһэн хүүргэтэй холбогдохо. Тиигэжэ «Талаан» хүүргэ транспортна ашаа тээлгэһээ хүнгэдхэхын тула энэ ажал хэгдэхэ. 2023 оной ноябрь һарада «Улан-Удэстройзаказчик» эмхи Москва хотын «ПромГражданПроект» эмхитэй түһөө түсэб зохёолгын саарһа данса бүтээхэ хэлсээ баталһан байна. Энэ хэрэгтэ 54,9 сая түхэриг шэглүүлэгдээ.

- Харгы дээрэхи хүүргын түсэл зохёогдонхой. Мүнөө жэлдэ барилгын ажалнуудай хэлсээ баталха ёһотойбди, - гэжэ Александр Гоге хэлэбэ.

Харгы дээрэхи 2-дохи хүүргэ Стеклозавод тсхондо баригдаха. 2024 оной март һарада түһөө түсэл зохёохо эмхи элирүүлэгдээ һэн. Санкт-Петербургын «Гео-Проект» эмхи энэ шэглэлээр хүдэлхэ боложо, хэлсээн баталагдаһан байна. Стеклозаводой харгы дээрэхи хүүргэ хүлеэгдэһэн түсэлнүүдэй нэгэн юм. Мүнөө хүдэлжэ байһан түмэр харгын гараса хаагдажа, Элеватор шадарай хүүргэ 20 хубяар хүнгэдхэгдэхэ. Түсэлэй-тоололгын дансануудта 44,8 сая түхэриг шэглүүлэгдээ.

- Стеклозавод тосхондо баригдаха харгы дээрэхи хүүргын түһөө түсэб зохёолго дүүрэхэ тээшээ болонхой. Һаяын сагта багахан хубилалтанууд оруулагдаха, удаань тобшолол хэдэг мэргэжэлтэдтэ эльгээгдэхэ, - гэжэ Буряад Уласай Унаа тээбэри, элшэ хүсэ ба харгын ажахы хүгжѳѳлгын талаар сайд Александр Гоге хэлэбэ.

Тиихэдэ Почтовый, Комушка, Горький, Южный тосхонуудта, Улаан-Үдын Автомобилистнуудай үргэн гудамжада,Загарайн аймагай Загарай ба Онохой тосхонуудта харгы дээрэхи хүүргын барилга хараалагдана. «Амидаралай хангамжын ажахы» гэжэ үндэһэтэнэй шэнэ түсэлэй, Улаан-Үдэ хотын мастер-түсэбэй шугамаар 2030 он болотор ашаглалда тушаагдаха юһэн хүүргын барилгада дүн хамта 22,82 млрд түхэриг шэглүүлэгдэхэ. Һануулхада, мастер-түсэб 2023 оной июль һарада Россиин Юрэнхылэгшын сэхэ даабаряар Оросой Холбоото Уласай Засагай газарта баталагдаһан байна.