217
Улаан-Үдэ ба Непал гүрэнэй Лалитпур анда нүхэд болобо. Буряад орон руу Чири Бабу Махарджанай ударидаһан делегаци эб найрамдалай холбоо бэхижүүлхэ, үйлэдбэриин ба болбосоролой объектнүүдые хараха зорилготойгоор ерээ. Непалай айлшадые Алексей Цыденов угтан абаа.
- Буряад орон Россиин буддын шажанай түб болоно. Манай эндэ хоёр дахин буддын шажанай хуралдаан үнгэргэгдөө. Хэмжээ ябуулгада 16 гүрэнэй түлөөлэгшэ хабаадаа, тэрэ тоодо Непалай. Ехэ удха шанартай хэмжээ ябуулга эмхидхэгдээ. Манай харилсаан саашадаа улам хүгжэхэ гэжэ найданаб. Россиин олон зон Непал гүрэнөөр аяншалдаг, мүнөө танай эрхэтэд Буряад орон руу ерэжэ эхилхэ, - гэжэ Буряадай Толгойлогшо хэлэбэ.
Буряад Уласай Засагай газарай гэшүүд аяншалгын, соёлой, үйлэдбэриин, болбосоролой, эмнэлгын һалбаринуудта хамтын ажалай арга боломжонуудтай танилсуулаа.
- Энэ үдэрһөө Улаан-Үдэ хототой анда нүхэд болобобди, Буряад Уластай дүтэ харилсажа эхилбэбди. Хуули эрхын ёһоор иимэ зэргэтэй болохын тула 3 жэлэй туршада ажал ябуулагдаа. Мүнөө хоёр талаһаа дүй дүршэлөөрөө хубаалдаха аргатай болобобди. Түүхын уг залгамжын баялиг хадагалха талаар ехэ дүршэлтэйбди. Будда бурхан Непалай Лумбини хотодо түрэһэн түүхэтэй. Россиин арад зонтой Буддын шажанай шэглэлээр бэелүүлхэ түсэлнүүд бии. Манай хотодо олон тоото дасангууд, мааниин гэрнүүд болон бэшэшье объектнүүд бии. Тиимэһээ Буряад Уласай Толгойлогшые, Улаан-Үдэ хотын хүтэлбэрилэгшые манай хото айлшалжа ерэхыень уринабди, - гэжэ Чири Бабу Махарджан хэлэбэ.
Непал гүрэндэ, Будда Шакьямуниин түрэһэн нютагта, Россиин буддын шажанай һүмэ баригдажа байна. Энэ хэрэгтэ Улаан-Үдэ хотын, Буряад Уласай үүргэ ехэ гэжэ тэрэ нэмэбэ.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
