424
«Буряадай патриодууд» гэжэ программа дүүргэһэн ветеранууд гүрэнэй ба нютагай засагай органуудта, уласай үйлэдбэринүүдтэ хүтэлбэрилхы тушаалнуудые эзэлхэ аргатай.
2024 оной декабрь һарада Россиин Юрэнхылэгшэ Владимир Путин холбоото уласай «Баатарнуудай саг» программа нютаг можонуудта бэелүүлжэ эхилхэ тухай дурадхал оруулһан байна. Тиигэжэ уласай хэмжээнэй «Буряадай патриодууд» программа байгуулагдаа һэн.
Байгша оной февралиин 25-да Буряад Уласай Толгойлогшо Алексей Цыденов тус программын Зүблэлэй суглаа үнгэргэһэн байна. Тэрэнэй тэмдэглэһээр, программа сэрэгэй тусхай операцида хабаадагшадай дадал шадабари амгалан байдалай оршондо бэелүүлхэ үүргэтэй.
– Һуралсалай курс дүүргэгшэдые хүтэлбэрилхы тушаалнуудта, дунда шатын тушаалнуудта дэбжүүлхэ, олзын хэрэгтэ, гүрэнэй ба нютагай засагта, болбосоролой, элүүрые хамгаалгын, барилгын болон бэшэшье һалбаринуудта ажалтай болгохо аргатайбди,- гэжэ Буряадай Толгойлогшо тэмдэглээ.
«Буряадай патриодууд» программа болбосоролой дүрбэн модульһоо бүридэжэ, “Гүрэнэй хүтэлбэри” мэргэжэлээр хабаадагшадые бэлдэхэ. Лекционно материалай хажуугаар мастер-классууд, тренингнүүд үнгэргэгдэхэ.
– Программада хабаадагшадые манай нютаг можын хүтэлбэрилэгшэд һургаха. Жэшээнь, Алексей Самбуевич болбосоролой программа өөрөө нээхэ. Үйлэдбэринүүдэй, нютагай засагай хүтэлбэрилэгшэд, сайдууд, тэдэнэй орлогшонор, Буряад Уласай Засагай газарай Түрүүлэгшын орлогшонор хэшээлнүүдые үнгэргэхэ, - гэжэ Буряадай Толгойлогшын зүбшэлэгшэ Лариса Гончикова хөөрэбэ.
– Һуралсалай үедэ хабаадагшадтай психологууд хүдэлхэ. Тэдэ Юрэнхылэгшын Академиин сахим номой сангай туһаар үнгэргэгдэдэг нэмэлтэ курсануудые оруулха аргатай, - гэжэ Буряад Уласай Болбосоролой болон эрдэм ухаанай сайдай орлогшо Наталья Сандакова тэмдэглэбэ.
Нютаг можын программада хабаадахын тула ПАТРИОТЫБУРЯТИИ.РФ сайт дээрэ үмсын кабинедтэ орожо, анкетын асуудалнуудта харюусаха хэрэгтэй. Мэдүүлгэнүүд мартын 28 болотор абтаха.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
