Буряад Улас ба Эрхүү можо буряад хэлэ хүгжөөхэ тухай хэлсээ баталба

Мартын 13-да Буряад Уласай делегаци Эрхүү можодо ажаллаа. Хамтын ажалай шэглэлнүүд тухай Буряад Уласай Толгойлогшо Алексей Цыденов, Эрхүү можын Хүтэлбэрилэгшэ Игорь Кобзев зүбшэн хэлсэбэ, буряад хэлэ хүгжөөхэ тухай хэлсээ баталба.

Уулзалгын үедэ Игорь Кобзев ба Алексей Цыденов Усть-Ордын Буряадай тойрогой хүгжэлтын асуудалда анхаралаа хандуулаа. Эрхүү можын Хүтэлбэрилэгшын тэмдэглэһээр, тойрогой дэбисхэр онсо зэргэтэй, Байгал шадарай хүдөө ажахыда  таряагаар баян нютагуудай нэгэн болоно. 2020 онһоо хойшо Усть-Ордын тойрогто ниигэмэй 20 гаран объект баригдаа, тэрэ тоодо һургуулинууд, хүүгэдэй сэсэрлигүүд, соёлой байшангууд, номой сан, олон үүргэтэ соёлой түб, тамирай объектнүүд. Энэ ажал үргэлжэлхэ.

Уулзалгын удаа суглаан болоо. Эндэ хоёр субъектнүүдэй хамтын ажалай хэлсээнэй ёһоор түсэблэгдэһэн хэмжээ ябуулгануудай бэелүүлгэ тухай зүбшэн хэлсээ. Суглаанда Гүрэнэй Дүүмын һунгамал Сергей Тен, Эрхүү хотодо Монголой элшэн түлөөлэгшэ Батсух Ичинхорлоо, Эрхүү можын ба Буряад Уласай  Засагай газарай, Эрхүү можын Хуули бүридхэлгын суглаанай ба Буряад Уласай Арадай Хуралай түлөөлэгшэд хабаадаа.

- Буряад Улас Эрхүү можын хүршэ, стратегическэ холбоо нүхэр. Нютаг можонуудай ажаһуугшад үни сагһаа хойшо түрэл гаралай ба нүхэдэй холбоотой, заншалта ёһоор наймаанай ба экономикын, эрдэмэй, соёлой, аяншалгын һалбаринуудта хэлсээтэй ажалаа ябуулдаг.

2022 ондо баталагдаһан хэлсээн ба түсэб манай хамтын ажал дансалаа, - гэжэ Игорь Кобзев хэлэбэ. 

- Эрхүү можын хүтэбэрилэгшэ Игорь Иванович Кобзевто сугтаа хэжэ байһан ажалай түлөө баяр хүргэнэб. Мүнөөдэрэй суглаанай үедэ хойто зүгэй дэбисхэрнүүдые газаар хангалгын асуудал харагдаа. Тиихэдэ Усть-Кут хотоһоо Северобайкальск, Таксимоһоо Бодайбо хүрэтэр автомобильна харгы хүгжөөхэ асуудалаар хөөрэлдөөбди. Аяншалгын замуудые хүгжөөхэ тухай мүн хэлсээбди, энэ асуудал Владимир Владимирович Путин дэмжээ. Буряад Улас ба Эрхүү можо нэгэдэжэ, аяншалга хангамжын ажахы байгуулха түсэб табяа, - гэжэ Алексей Цыденов тэмдэглээ. 

Субъектнүүд байгаалиин субад эрдэни болохо Байгал далай хамгаалгын ба аяншалга хүгжөөлгын түлөө хамта харюусана. Игорь Кобзев Байгал тухай хуули нарижуулха асуудалда эдэбхитэй хабаадаһанай, Сергей Тен һунгамалай хэжэ байһан ехэ ажал дэмжэһэнэй түлөө Алексей Цыденовтэ баяр хүргэбэ.

Оросой Холбоото Уласай Юрэнхылэгшын даабаряар Эрхүү можо ба Буряад Улас «Табан далай ба Байгал» программын хэмжээндэ «Шэдитэ Байгал» гэжэ түсэл бэелүүлнэ. Тэрэнэй ёһоор, жэлэй ямаршье сагта хүдэлдэг холбоото уласай курортнууд байгуулагдаха.

Эрдэм ухаанай һалбарида онсо амжалтанууд туйлагдаа. Хоёр талын хүсөөр байгуулагдаһан эрдэмэй ба болбосоролой «Байгал» гэжэ дэлхэйн хэмжээнэй түб 2021 онһоо хүдэлнэ. Эрдэмэй ба болбосоролой түб гурбан шэглэлээр 18 түсэл бэелүүлнэ. Энэ талаар һайн дүнгүүдтэйбди гэжэ Игорь Кобзев хэлээ. Тамирай ба соёлой һалбаринуудта хамтын ажалай һайн дүнгүүд мүн харуулагдаа. Тэрээнһээ гадуур ой модо һэргээхэ, хуули бусаар модо отологшодтой тэмсэхэ хэрэг урагшатай байба гэжэ  суглаанда хабаадагшад тэмдэглээ.

Суглаанай дүнгөөр Алексей Цыденов ба Игорь Кобзев хамтын ажаябуулга тухай хэлсээ баталба, тэрэ тоодо буряад хэлэ хүгжөөхэ талаар. Һаяын сагта хэмжээ ябуулгануудай түсэб табигдаха.

Уулзалгын түгэсхэлдэ делегациин гэшүүд  «Алдар солын хэтэ мүнхэ гал» гэжэ мемориалда баглаа сэсэгүүдые табиба. Энэ үдэрнүүдтэ тэдэ Усть-Ордын Буряадай тойрог ошожо, ниигэмэй объектнүүдые хараха, Сагаалганда зорюулагдаһан һайндэрэй хэмжээ ябуулгануудта хабаадаха.