263
Үнгэрэгшэ жэлтэй сасуулбал, 2025 оной эхинһээ Буряад Уласай хүдөө ажахыда банкнууд гурба дахин ехэ урьһаламжа үгөө. Россельхозбанкын түрүүлэгшэ Буряад орон руу албанай хэрэгээр ерэжэ, уласай Толгойлогшо Алексей Цыденовтэй уулзаба.
Таланууд Буряад Уласай хүдөө ажахын үйлэдбэрилэгшэдые дэмжэлгын шухала асуудалнууд тухай зүбшэн хэлсээ, нютаг можын агропромышленна комплексын хүгжэлтэ тухай хөөрэлдөө, тиихэдэ фермернүүдые ба хүдөөгэй үйлэдбэринүүдые урьһаламжын мүнгөөр хангаха хүнгэлэгдэмэл арга боломжонуудые хараа.
- Урьһаламжын бариисатай нүхэсэл, гүрэнэй талаһаа дэмжэлгэ хүдөө ажахын хүгжэлтэдэ тон шухала. Хамтын оролдолгоор Буряад ороной хүдөө ажахы хүгжөөхэ эрхэ нүхэсэл байгуулхабди, - гэжэ Буряадай Толгойлогшо Алексей Цыденов хэлэбэ.
Хамтын ажалай дүнгөөр, нютаг можын захиргаанай ба Толгойлогшын оролдолгоор Буряад Уласай хүдөө ажахы хүгжэнэ.
«Нютаг можодо хүрэнгэжүүлгын 135 түсэл дэмжээбди, тэдэнэй хахадһаа ехэнь хүдөө ажахыда. Мүнөө сагай байдалда тааруу теплична комплекснууд, мяха үйлэдбэрилдэг заводууд, шубуунай фабриканууд болон бэшэшье түсэлнүүд бэелүүлэгдэнэ. Нютагай үйлэдбэрилэгшэдтэ дэмжэлгэ үзүүлхэ гээшэ тон шухала, - гэжэ Борис Листов хэлэбэ.
Үнгэрэгшэ 2024 оной туршада 6,8 млрд түхэригэй урьһаламжа хүдөө ажахын үйлэдбэринүүдтэ үгтэһэн байна. 2023 онтой сасууулхада, энэ тоо 67 хубяар ехэ гэжэ Борис Листов мэдээсээ.
Россельхозбанк Буряад Уласта ниигэмэй түсэлнүүдые бэелүүлнэ, энэ асуудалда онсо анхарал хандуулагдаа. 2021 онһоо хойшо Буряадай гүрэнэй хүдөө ажахын академиин дэргэдэ «Фермерэй һургуули» гэжэ түсэл бэелүүлэгдээ. Борис Листовой тэмдэглэһээр, 134 хүн хүдөө ажахын гурбан шэглэлээр эндэ һуража гараа. Эрхимээр һургуули дүүргэһэн зургаан хүн банкын грантда хүртөө. Буряад Улас 2025 ондо «Фермерэй һургуули» түсэл үргэлжэлүүлхэ байһанаа мэдүүлээ. Тиихэдэ нютаг можо «Своё» гэжэ фестиваль эдэбхитэйгээр дэмжэдэг. Дүрбэн жэлэй туршада 170000 гаран хүн фестивальда хабаадаа, фермернүүдэй олзо 24 сая түхэригһөө үлүү гараа.
Автор: Янжима ДАРМАЕВА бэлдэбэ
Фото: Анна Огородник
