Заншалта уулзалга

Сагаан һарын 15-дахи дүйсэн үдэртэ 57-дохи һургуулиин номой сан нэгэ үдэрөөр эдеэ хоол бариха газар болон­хой. Буряад хэлэнэй багшанар Светлана Антоновна Цыдендамбаева, Валенти­на Дугаровна Патаева гэгшэдэй удари­далга доро Сагаалганай шэрээ зүбөөр зохёогдоно. 

Хэмжээ ябуулгада ерэһэн хүндэтэ айлшад Сагаалганай шэрээ яагаад бүтээгдэхэб, ямар эдеэ хоол табигда­хаб гэжэ нэн түрүүн танилсаба. Ямар табаг алин талаһаа табигдахаб гэхэһээ абаад, олон заншалта юумэ тэдэ һонирхон мэдэжэ абаа. Сагаан эдеэнэй дээжые бариһанай удаа һургуулиин ша­бинар һайхан үгэнүүдтэй үреэлээрээ, хонгёо гоё дуугаар, уянгата шүлэгүүдээр сугларагшадые баярлуулба.

Һуралсалай гуламтын шабинарай бу­ряад хэлээр туйлаһан һүүлшын амжал­тануудтай түрэлхидые танилсуулба. Тус хэмжээ ябуулгын хоёр үдэрэй урда тээ 57-дохи һургуулиин үхибүүд «Мүнгэн то­лон» гэһэн хотын урилдаанда хабаадажа, шангай һууринуудые абажа шадаа. Эндэ Валентина Дугаровна багша тэдэниие бэлдэһэн байна.

57-дохи һургуулиин үхибүүд һүүлэй хэдэн жэлдэ Ивалгын дасанай дэргэдэ болодог «Эхэ хэлэн - манай баялиг» гэһэн урилдаанда хабаадана. Гар урлалай шата тэдээндэ тон ехээр һайшаагдана.

- Гэртээ үхибүүдтээ буряад хэлэн­дээ дурлуулжа, түрэл хэлэн дээрээ ха­рилсажа, ёһо заншалнуудые заажа, һургажа байгыт даа, - гэжэ һургуулида буряад хэлэ заадаг багшанар сугларһан түрэлхидтэ хандаһан байна.

Согтой зугаатай уулзалга ёохор хата­рай дүхэригөөр түгэсэбэ. Булта баяртай­нууд гэр гэртээ тараа.