Эхэ орондоо дуратайгаар хүмүүжүүлхэ талаар ажал Буряадта ябуулагдана

Буряад Уласай ниислэл Улаан-Үдэдэ «Шухала юумэн тухай бүдүүн зонтой хөөрэлдөөн» гэһэн нээмэл хэмжээ ябуулга үйлэдбэринүүдэй, эмхи зургаануудай коллективүүдтэ эмхидхэгдэнэ. Мартын 17-до Улаан-Үдын ЛВРЗ-н талмай дээрэ тус үйлэдбэриин, авиационно заводой, «Улан-Удэстальмост» нэгэдэлэй мэргэжэлтэд суглараа.

«Шухала юумэн тухай бүдүүн зонтой хөөрэлдөөн» гэһэн лекци Алас Дурнын тойрогоор Россиин Юрэнхылэгшын  бүрин эрхэтэ түлөөлэгшын орлогшо Григорий Куранов үнгэргэбэ.

- Эрхэтэдээ зүб мүрөөр, Эхэ орондоо дуратайгаар хүмүүжүүлхэ гээшэ гүрэнэй гол бодолго болоно. Энэ талаар ажал ябуулаагүй һаа, 15-20 жэлэй саана гүрэн үгы боложо магадгүй. Өөртөө адли зониие хүмүүжүүлхэ хэрэг хүн бүхэнэй харюусалгатай даабари, теэд үндэһэн баялиггүйгөөр энэ хэрэг урагшаа ябахагүй, - гэжэ Григорий Куранов тэмдэглээ.

Залуушуулдаа дүй дүршэлөө дамжуулха, эхэ орондоо дуратайгаар хүмүүжүүлхэ ажалай шэнэ онол аргануудтай танилсаха, оюун ухаанай ба ёһо журамай баялиг бэхижүүлхэ асуудалнууд хэмжээ ябуулгада харагдаа. Ургажа ябаа залуу үетэниие  һургаха хэрэгтэ шухала үшөө нэгэ асуудал - баялигуудай нэгэдэл тухай мүн зүбшэн хэлсээ. Эдэ бүгэдэ болбосоролой системэдэ хубилалтануудые оруулха, һургалгын шэнэ программануудые байгуулха эрилтэ табина.

Григорий Курановай тэмдэглэһээр, Эхэ орондоо дуратайгаар залуу үетэниие хүмүүжүүлхэ үргэн дэлисэтэй түсэл бэелүүлхэ тухай дурадхал Буряад Уласай хүтэлбэри бусадһаа түрүүн оруулаа, бүхы сэсэрлигүүдтэ ба һургуулинуудта туршалгын түсэл нэбтэрүүлхэ һанамжаараа хубаалдаа. Сэсэрлигһээ эхилжэ энэ ажал ябуулбал, үхибүүдтэ тон туһатай байха һэн гэжэ багсаагдана.

Нээмэл хөөрэлдөөн мүнөө сагта эгээ шухала болохо сэдэбүүд тухай зүбшэн хэлсэхэ арга боломжо үгэнэ.

Мартын 18-да «Шухала юумэн тухай бүдүүн зонтой хөөрэлдөөн» гэжэ хэмжээ ябуулгада багшанар ба банкын мэргэжэлтэд хабаадаа.