Нохой баридаг зондо хабаатай Буряад Уласай хуули шангадхаха

Буряад Уласай Засагай газар, Арадай Хурал нохой баридаг зондо хабаатай хуулида заһабари нэмэлтэнүүдые оруулха. Мартын 17-до үнгэргэгдэһэн суглаанай үедэ Алексей Цыденов аймагуудта харууһагүй амитадтай ябуулагдажа байһан ажал шангадхахыень хандаба. Буряад Уласай Засагай газарта заһабари нэмэлтэнүүдые оруулха талаар ажал түргэдхэхэ даабари үгэбэ. 

- Таанад хаража байнат, Зэдын аймагта аймшагтай ушар болоо. Нохойнуудта анхаралаа үшөө дахин хандуулагты. Нэгэдэхеэр, эзэгүй нохойнуудые бариха ажал шангадхаха хэрэгтэй. Хоёрдохёор, ехэнхидээ эзэтэй нохойнууд хүндэ добтолно гэһэн ехэ олон гомдол ниигэмэй сүлжээндэ байдаг. Эзэдынь нохойнуудаа һайнаар харанагүй,- гэжэ Алексей Цыденов тэмдэглээ.

Тиин бэлдэгдэжэ байһан заһабари нэмэлтэнүүдэй тоодо нохойгоо һула табиһан зоной яла 50 000 хүрэтэр дээшэлүүлэгдэхэ. Ялын хэмжээн амитанай хэмжээнһээ мүн дулдыдаха. Буряад Уласай Засагай газар нохойгоо һула табиһан эзэдтэ яла ашахаһаа гадна ниитын хүдэлмэридэ татаха хэһээлтэ оруулха үүсхэл гаргана.   Тэрээнһээ гадуур нохойнуудые заабол электронно тэмдэгтэй болгохо түсэб табигдана. Тэмдэг табиха гурим дүүргээгүй зондо мүн 50 000 хүрэтэр яла ашагдаха.

- Добтолһон нохойн эзэниие элирүүлхэнь хүшэр байдаг. Адли, теэд энэ минии нохой бэшэ гэжэ ехэнхидээ хүнүүд хэлэдэг. Эзэниие бэдэрэлгэ удаашардаг, энэ үедэ нохойдо хазуулһан хүндэ эмнэлгэ гараха хэрэгтэй болоно ха юм. Миин бирка нохойдо зүүлгээд орхихо бэшэ, харин заабол электронно тэмдэгтэй болгохо хэрэгтэй. Нохой абажа тэжээхэдээ, тэрэнэй түлөө эзэниинь харюусалга абана,- гэжэ Буряадай Толгойлогшо тэмдэглээ.

Тэмдэглэхэдэ, Буряад Уласай хуулиин ёһоор нохойгоо һула табиһан эрхэтэд мүнөөдэр 3000- 5000 түхэригэй штраф түлэнэ. 2024 ондо  баримта гэршэлһэн 1663 бэшэг зохёогдоо, харин байгша оной 2 һарын туршада 181.