Крымэй Россиин бүридэлдэ ороһон үдэртэ зорюулагдаһан митинг Буряад Уласта үнгэргэгдэбэ

Мартын 18-да Улаан-Үдын Лхасаран Линховоиной нэрэмжэтэ Театральна талмай дээрэ Крымэй Россиин бүридэлдэ ороһоор 11 жэлдэ зорюулагдаһан митинг үнгэргэгдэбэ. Хэмжээ ябуулгада уласай олониитэ, сэрэгэй тусхай үйлэ хэрэгүүдэй ветеранууд, буряад эстрадын дуушад, һайн дуратанай эмхинүүдэй ба гүйсэдхэхы засагай түлөөлэгшэд хабаадаа.

- Мүнөөдэр Крымэй Россиин бүридэлдэ ороһон шухала үйлэ хэрэг тухай һанан дурсахаяа сугларбабди. 11 жэлэй саана Крым Улас ба Севастополь хото Оросой Холбоото Уласай бүридэлдэ дахяад абтаһан тухай хэлсээн баталагдаа һэн. Энэ үдэр манай арадай нэгэдэлэй, аюулгүйн ба һалбаран хүгжэлгын һүлдэ тэмдэг болоно. Түүхэтэ референдум дээрэ арад зон Россиин бүридэлдэ орохо хүсэлөө баталаа. Үнгэрһэн жэлнүүдэй хугасаа соо Крым ба Севастополь һайн дүнгүүдые туйлаа. Нютаг можын экономико бэхижээ, хангамжын ажахынууд һэльбэн шэнэлэгдээ, шэнэ һургуулинууд, сэсэрлигүүд, эмнэлгын газарнууд баригдаа, харгынууд заһабарилагдаа, харин Крымэй хүүргэ һөөргэнь ниилүүлэлгын  һүлдэ тэмдэг болоо. Манай шадахагүй, диилэхэгүй юумэн үгы гэжэ харуулаабди. Мүнөөдэр манай нютагайхид сэрэгэй тусхай үйлэ хэрэгүүдэй боложо байһан газарта шэн зоригтойгоор уялгаяа дүүргэнэ, гүрэнэйнгөө ерээдүйе аршална. 11 жэлэй саана абтаһан шиидхэбэри тон зүб байгаа, - гэжэ Буряад Уласай Засагай газарай Түрүүлэгшын нэгэдэхи орлогшо Всеволод Мухин сугларагшадые амаршалба.

Хэмжээ ябуулгада Сэсэг Аюшеева, Тимур Болотов, Эдуард Жагбаев, Анна Комолова, Виктор Паньков, Роман Нечаев, «Сосновый бор» гарнизоной Ольга Васюкова,  Наталья Бибикова гэгшэд хабаадажа, дуу хатараа бэлэглээ. Митингын түгэсхэлдэ хабаадагшад Крымай Россиин бүридэлдэ ороһон үйлэ хэрэг гүрэнэй түүхэдэ ехэ удха шанартай байһые тэмдэглээ. 

- Крымэй ба Севастополь хотын Росси гүрэнтэй һөөргөө ниилэһэн үдэрөөр залуушуулай зүгһөө амаршалнаб. Крым стратегическэ удха шанартай объект, Крым- манай омогорхол. Арад зонойнь һанал хүсэлөөр, тэдэнэй найдалаар хэдэн арбаад жэлэй удаа Крым Россиин бүридэлдэ дахяад ороо. Мүнөөдэр олон эрхэтэд сэрэгэй тусхай операциин газар руу туһа үзүүлхэеэ ошоно. «Добродом» эмхиин һайн дуратан, «Залуу Гвардиин» эдэбхитэд, Буряад ороной бүхы ажаһуугшад илалтын түлөө нэгэдээ, - гэжэ һайн дуратан Александр Чиреш хэлэбэ.

Һануулхада, 2014 оной мартын 1-дэ Крымдэ болоһон политическэ хүдэлөөнэй ба эрид буруушаалгын мүрөөр Крымэй премьер-министр Сергей Аксенов аюулгүй байдал хангаха хэрэгтэ туһалхыень Россиин Юрэнхылэгшэдэ хандаһан байна. Тиин Крымэй Дээдын зүблэл Россиин бүридэлдэ орохо тухай албан ёһоной һуралга эльгээһэн юм. 2014 оной мартын 16-да үнгэргэгдэһэн референдумдэ Крымэй ажаһуугшадай 96,77 хуби, Севастополь хотын ажаһуугшадай 95,6 хуби Оросой Холбоото Уластай һөөргөө ниилэхэ хүсэлөө мэдүүлээ. Тэрэл оной мартын 18-да Россиин Юрэнхылэгшэ Владимир Путин энэ ушараар баталагдаха хэлсээндэ гараа табиһан байна. Тиигэжэ хахад арал Россиин бүридэлдэ бусаагдаа һэн.