2019 онһоо хойшо Буряад Уласта тамирай 100 гаран объект баригдаа

Буряад Уласай Тамирай ба залуушуулай бодолгын сайд Иван Козырев мартын 18-да үнгэргэгдэһэн «Шухала юумэн тухай сэхэ руунь» пресс-клуб дээрэ ажалай дүнгүүдээр хубаалдаба. Эндэ «Демографи» гэжэ үндэһэтэнэй түсэлэй хэмжээндэ бэелүүлэгдэжэ байһан «Тамир - ажамидаралай тогтоһон журам» программын дүнгүүд согсологдоо, үндэһэтэнэй «Залуушуул ба хүүгэд» түсэл Буряад Уласта бэелүүлгэ түсэблэгдэбэ.

2019 онһоо хойшо «Тамир- ажамидаралай тогтоһон журам», «Бизнес-спринт» түсэлнүүдэй, элдэб программануудай хэмжээндэ тамирай 100 гаран объект баригдаа. Тэдэнэй эгээ томонь - Улаан-Үдын Мүльһэн Ордон. Мүнгэ һомологшо эмхи Ордоной 3-дахи блок 2025 оной эсэс болотор барижа дүүргэхэ. 2020 ондо Улаан-Үдэдэ һур харбалгаар нютаг можын түб баригдаа, харин 2021 ондо нэгэ нэгээрээ тулалдаанай нютаг можын түб бодхоогдоһон байна. Улаан-Үдэ хотын 103-дахи микрорайондо волейболой түбэй барилга дүүрэхэ шатадаа хүрэхэнь. 2019 онһоо 2024 он болотор «Тамир- ажамидаралай тогтоһон журам» түсэлөөр тамирай 61 талмай баригдаа. «Бизнес-спринт» түсэлэй хэмжээндэ табан талмай байгуулха талаар хэмжээ ябуулганууд үнгэргэгдөө.

Ерэхэ гурбан жэлэй туршада тамирай оршон хангалгын байгуулгануудай объектнүүдые бариха тухай Буряад Уласай Тамирай ба залуушуулай бодолгын сайд Иван Козырев хөөрэбэ.

– Энэ жэлдэ Баргажан тосхондо тамирай түбэй барилга үргэлжэлүүлхэбди. ГТО-гой 15 талмайн барилга мүн үргэлжэлхэ. Ерэхэ 3 жэлэй туршада тамирай «ухаатай» талмайнууд бии болохо. Хяагта хотодо баригдажа байһан бассейн 2026 ондо ашаглалда тушаахабди. Энэ хэрэгтэ 300 сая түхэриг һомологдоо. Түхеэрэлгэнүүдые абажа тодхохо, байшанай һуури бэлдэхэ, инженернэ һужаа ябталха хэрэг манай талаһаа мүнгөөр хангагдаха. Мүнөө түсэл бэлдэжэ байнабди, - гэжэ Иван Козырев хөөрэбэ. 

Тамирай ба залуушуулай бодолгын сайд бага наһанһаа тамираар бэеэ һорихо түб байгуулха тухай мэдээсэбэ. Түбтэ 6-һаа 12 хүрэтэр наһатай хүүгэдэй тамирай ямар бэ даа нэгэ янзада урагшатай байхые элирүүлдэг аппаратно-программна комплекснүүд хараалагдаха. Мүнөөдэр түбэй ажалай ёһо журам зохёон байгуулагдана.