Буряад Уласта залуушуулай агентство байгуулагдаха

Буряад Уласай Засагай газарта энэ жэлэй эхинһээ залуушуулай хэрэгүүдээр агенство байгуулха ажал ябуулагдана. Энээн тухай мартын 18-да «Шухала юумэн тухай сэхэ руунь» пресс-клубай үедэ Буряад Уласай Тамирай ба залуушуулай бодолгын сайдай орлогшо Татьяна Парпаева мэдээсэбэ.

Мүнөөдэрэй байдалаар хэрэгтэй саарһа дансануудые бүридхэхэ ажал ябуулагдажа байна. Уласай агентство май һарада хүдэлжэ эхилхэ, тэрэнэй хүтэлбэрилэгшые Буряад Уласай Толгойлогшо томилхо.

– Залуушуул манай ажабайдалай бүхы һалбаринуудта бии. Тэдэ элүүрые хамгаалгада, болбосоролдо, үйлэдбэринүүдтэ, тамирай һалбарида, бэшэшье шэглэлнүүдээр хүдэлдэг. Шэнэ агенство Засагай газарай ажаябуулгада, уласта боложо байһан үйлэ хэрэгүүдтэ залуушуулые хабаадуулха хэрэгтэ бүри ехэ анхаралаа табиха, Буряад ороноо хүгжөөлгэдэ тэдэнэй дадал шадабари аша үрэтэйгөөр хэрэглэхэ. Мүнөө бидэ ЕГРЮЛ бүридхэжэ байнабди, майн һайндэрнүүдэй һүүлээр Залуушуулай хэрэгүүдээр уласай агентство болохобди. Эндэ 17 хүн хүдэлхэ, - гэжэ Татьяна Парпаева тэмдэглэбэ.

24 мэргэжэлтэдтэй Буряад Уласай Залуушуулай түб Агентствын мэдэлдэ орохо гэжэ Буряад Уласай Тамирай ба залуушуулай бодолгын сайдай орлогшо Татьяна Парпаева нэмэбэ.

Һануулхада, залуушуулай политика бэелүүлхэ үүргэтэй гүйсэдхэхы засагай амяараа орган байгуулха үүсхэл 2022 оной эсэстэ Россиин Юрэнхылэгшэ Владимир Путин гаргаһан байна. Тэрэ үедэ гүрэнэй толгойлогшо нютаг можонуудай хүтэлбэрилэгшэдтэ залуушуулай хэрэгээр агентство байгуулха даабари үгөө һэн. Агентство залуушуултай ажал ябуулха, залуу үетэнэй хүгжэхэ оршон байгуулха.