Ниигэм 20 mar 2025 461

Буряадай түрүүшын Юрэнхылэгшын ажабайдал, ажал тухай лекцинүүд үнгэргэгдэнэ

Тус хэмжээ ябуулга Леонид Потаповай түрэһөөр 90 наһанай ойдо зорюулагдана

Буряадай түрүүшын юрэнхылэгшэ Леонид Васильевич Потаповай түрэһөөр 90 наһанай ойдо зорюулагдаһан хэмжээ ябуулганууд Буряад Уласта эмхидхэгдэнэ.

Мартын 18-да Улаан-Үдэдэ Леонид Потаповай ажамидарал, ажалайнь зам тухай лекцинүүд эхилээ. Түрүүшын хэмжээ ябуулга Улаан-Үдын 8-дахи һургуулида үнгэрөө. Түүхын эрдэмэй кандидат, Доржи Банзаровай нэрэмжэтэ гүрэнэй ехэ һургуулиин түүхын кафедрын доцент Алтына Шойдонова лекци уншаба.

Һурагшадые  Буряад Уласай Болбосоролой болон эрдэм ухаанай сайдай орлогшо Солбон Дармаев мэндэшэлээ. 

- Леонид Васильевич Эхэ орондоо, арад зондоо үнэн шударгыгаар алба хэһэн хүн. Тэрэ таряашанай юрын бүлэдэ түрэһэн юм. Бага наһанһаа ажалша бэрхэ, эрдэм мэдэсэтэй болохо гэжэ эрмэлзэдэг һэн. Инженер мэргэжэлтэй хүбүүн уласай хүтэлбэрилэгшэ болотороо ургаа. Мүнөөдэрэй хэмжээ ябуулгада ургажа ябаа залуу үетэн гүрэнэй гайхамшагта ажаябуулагшадай ажабайдалтай, хэһэн ажалтайнь гүнзэгыгөөр танилсаха арга боломжодо хүртэнэ, - гэжэ сайдай орлогшо тэмдэглээ.

Һурагшадтай эмхидхэгдэһэн уулзалгада Буряадай түрүүшын юрэнхылэгшые мэдэхэ, таниха байһан олониитын ажаябуулагшад ерээ.

Буряад ороной дайнай ба ажалай, Зэбсэгтэ хүсэнүүдэй, хуули хамгаалгын органуудай ветерануудай олониитын эмхиин түрүүлэгшын орлогшо Степан Ефимов «Минии Буряадай арадуудта дураяа мэдүүлэн. Леонид Потапов тухай дурсалганууд» гэһэн номтоёо танилсуулаа. Энэ ном 2023 ондо хэблэгдэһэн байна. Буряадай түрүүшын юрэнхылэгшэ тухай дурсалганууд, тэрэнэй ажабайдал, хэһэн ажал тухай материалнууд номдо оруулагдаа.

Степан Ефимов Леонид Васильевич Потаповай командада олон жэлэй туршада хүдэлһэн юм. Тэрэ Ажалай ба ажаһуугшадые ниигэмэй талаар хамгаалгын сайдай, Буряад Уласай Засагай газарай түрүүлэгшын орлогшын тушаалнуудта хүдэлһэн намтартай.

- Леонид Потапов талаан бэлигтэй хүтэлбэрилэгшэ, эрдэмтэн, экономикын эрдэмэй доктор байгаа. Ажалша бэрхэ, хүндэмүүшэ зантай һэн. Ном дээрэ хүдэлһэн зон тэрэнэй арад зондоо, түрэл нютагтаа, Эхэ орондоо аргагүй дуратай байһые тэмдэглээ, - гэжэ Буряадай ветерануудай эмхиин түрүүлэгшын орлогшо онсолоо.

Степан Ефимов Леонид Потаповай хэлэһэн үгэнүүдые һурагшадта уншажа үгөө: «Бүхы минии һанал бодол, хэжэ байһан хэрэгүүдни, бүхы минии ажамидарал Буряад оронойнгоо арадуудта дуранай мэдэрэлээр халин байдаг һэн. Энэ мэдэрэл Эхэ оронойнгоо һалбархын тула харюусалгатай, зарим ушарта хүшэр шиидхэбэринүүдые абаха хэрэгтэ хүсэ шадал үгэдэг һэн».

Буряад Уласай Толгойлогшын дэргэдэхи наһатайшуулай Зүблэлэй гэшүүн Доржи Сультимов Потаповай хүтэлбэриин үе сагай дурсалгануудаар хубаалдаба.

- Леонид Васильевич тухай хөөрэхэ юумэн олон. Советскэ Союзай һандаржа байһан үедэ тэрэ манай уласай хүтэлбэрилэгшэ болоо һэн.  Хүндэ жэлнүүдтэ  хүтэлбэрилэгшээр хүдэлөө, материальна-техническэ база бэхижүүлээ, ниигэмэй ба экономикын байдал һайжаруулаа. Буряадай драмын Хоца Намсараевай нэрэмжэтэ театрай хүтэлбэрилэгшээр хүдэлһэн хадаа, соёл урлалда аргагүй ехэ анхаралаа хандуулдаг байһан гэжэ хэлэхэ байнаб. 90-ээд онуудта салин саг соогоо түлэгдэдэггүй һэн. Леонид Васильевич ехэ оролдолго гаргажа, бюджетнэ эмхи зургаануудта хүдэлдэг зондо бага, ехэшье һаа салин түлэхэ арга олодог һэн. Леонид Васильевич зүжэгшэдые гэр байратай болгохо талаар мүнгэ һомолдог байгаа. Тэрэ үедэ театрай байшан заһабарилха, материальна-техническэ база бэхижүүлхэ ехэ ажал ябуулаа, - гэжэ Доржи Сультимов хөөрэбэ.

Буряад Уласай юрэнхылэгшэ буряад хэлэ мэдэдэг һэн. Уулзалганууд ород ба буряад хэлэн дээрэ үнгэргэгдэдэг байгаа.

Леонид Потаповта зорюулагдаһан хэмжээ ябуулганууд үнгэрэгшэ жэлдэ эхилээ, 2025 оной туршада үргэлжэлхэ. Эрдэмэй конференцинүүд, лекцинүүд, спартакиаданууд, үзэсхэлэнгүүд Буряад Уласай түрүүшын юрэнхылэгшын түрэһөөр 90 наһанай ойдо зорюулагдаха.                                                                                                                      

Автор: Янжима ДАРМАЕВА бэлдэбэ

Фото: Буряад Уласай Засагай газарай мэдээсэлэй албан