496
«Госуслуги Дом» хабсаргалта урид олон байратай гэрнүүдэй ажаһуугшад хэрэглэхэ аргатай байгаа. Мүнөө тус хабсаргалтада шэнэ арга боломжонууд нэмэгдэжэ, үмсын гэрнүүдтэ ажаһуудаг зон тэрэниие хэрэглэдэг болобо. ГИС ЖКХ-да оруулагдаһан үмсын зөөри «Госуслуги Дом» хабсаргалтада һурамхяар ороно.
- Түбэй дулаагаар ба уһаар хангамжатай гэрнүүдэй эзэд коммунальна хангамжын түлөө мүнгэ түлэхэ, зайн галай счётчигуудай харуулһан гэршэлэл эльгээхэ, зайн галаар ба уһаар хангалгада хэрэгтэй болодог хэрэгсэлнүүдые шалгаха асуудалнуудаар эмхи зургаануудта сэхэ хандаха арга боломжодо хүртэбэ, - гэжэ Буряад Уласай Барилгын ба гэр байрын ажахы шэнэлэлгын сайдай уялга саг зуура дүүргэгшэ Дмитрий Кобунов тэмдэглэбэ.
Тэрээнһээ гадуур гэрэй эзэн түрэлхидтөө гү, али ондоо зондо энэ хэрэг даалгаха аргатай. Энэ арга хабсаргалтада һая бии болоо. Мүнөө 10 000 хүн ондоо эзэтэй гэр байрын асуудалнуудые шиидхэнэ.
- «Госуслуги Дом» хабсаргалта манай гүрэнэй ажаһуугша бүхэндэ тааруу зохид болгохо гэжэ оролдонобди. Үмсын гэрнүүдые энэ хабсаргалтада оруулха хэрэг шухала алхам болоно. Арга боломжонуудые үргэдхэхэ ажал үргэлжэлһөөр, - гэжэ «Мэдээсэлэй системын оператор» акционернэ бүлгэмэй генеральна захирал Александр Абрамков хэлэбэ.
Россиин Барилгын яаман Россиин Тоо оньһоной яамантай хамта нэгэ газарта- «Госуслуги Дом» хабсаргалтада- ЖКХ-гай асуудалнуудые шиидхэхэ мобильна платформо нэбтэрүүлгын ба хүгжөөлгын ажал ябуулна. «Мэдээсэлэй системын оператор» гэжэ акционернэ бүлгэм тоо оньһоной талаар ажал ГИС ЖКХ-гай база дээрэ хүгжөөнэ. Хабсаргалта RuStore, AppStore, Google Play ба AppGallery сооһоо буулгажа абахаар.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
