281
Мартын 20-до Буряад Уласай Толгойлогшо Алексей Цыденов Улаан-Баатар хотын Зайсан-Толгой хада дээрэ оршодог совет сэрэгшэдэй хүшөөдэ баглаа сэсэг табиха ёһололдо хабаадаба. Халхын Голдо япон булимтарагшадтай байлдаанда баатарлигаар унаһан сэрэгшэдэй дурасхаал хүндэлэлгэ Буряад Уласай хүтэлбэриин албанай хэрэгэй онсо удхатай хубинь байгаа.
Буряад Улас Агууехэ Илалтын 80 жэлэй ойдо бэлдэнэ. Гэхэтэй хамта, Монгол арадай илалтада оруулһан хубита мартаагүй. Январь һарада Россиин хабаадалгатайгаар Зайсан-Толгойн хүшөө һэльбэн шэнэлэгдээ. Монголдо Оросой Холбоото Уласай Зэбсэгтэ хүсэнүүдэй сэрэгэй атташе Павел Петрунин һэльбэн шэнэлэлгын ажалнуудай хэмжээн тухай хөөрэбэ.
Хүшөөдэ баглаа сэсэг табиха ёһололдо Улаан-Баатар хотын толгойлогшын 1-дэхи орлогшо Даваадалай, Монголой Зэбсэгтэ Хүсэнүүдэй түлөөлэгшэд хабаадаа.
“Үри хүүгэдтээ бидэ түүхэеэ дамжуулхабди. Халхын голой байлдаанда Советскэ Союз Монгол гүрэндэ туһалаа, удаань Агууехэ Эсэгын дайнай эхилхэдэ, Монгол гүрэн бидэниие дэмжээ. Мүнөө болотор бидэ бэе бэедээ туһалжа ябанабди. Манай хани барисаан үргэлжэлхэ. Монголой Юрэнхылэгшэ Ухнаагийн Хурэлсух манай Юрэнхылэгшын урилгаар Москвада болохо Илалтын Жагсаалда хабаадаха. Энэ ехэ удха шанартай, бидэ баяртайбди, - гэжэ Буряадай Толгойлогшо хэлээ.
Зайсан Толгой хүшөө Монголой ниислэлэй мэдээжэ, нэрэ суутай газарнуудай нэгэн, Россиин ба Монголой арадуудай хани барисаанай, баатаршалгын, дурасхаалай һүлдэ.
Хүшөө 1979 ондо бодхоогдоһон байна.
Дурасхаалай акцида Россиин экономикын Г.В. Плехановай нэрэмжэтэ университедэй Улаан-Баатарай таһагай дэргэдэхи һургуулиин шабинар, Монголой сэрэгэй албанай ветерануудай олониитын эмхинүүдэй түлөөлэгшэд дурасхаалай хэмжээ ябуулгада хабаадаа.
“Агууехэ Эсэгын дайнда илалта туйлаһаар 80 жэлэй ой тэмдэглэгдэхэнь. Мүнөөдэр бидэ байлдаанда унаһан сэрэгшэдые дурсан һананабди, хүндэлэлөө мэдүүлнэбди, - гэжэ акцида хабаадаһан Алтансух Анхбаяр хэлэбэ.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
