254
Энээн тухай мартын 21-дэ үнгэргэгдэһэн пресс-клубта Буряад Уласай Болбосоролой болон эрдэм ухаанай сайд Валерий Поздняков мэдээсэбэ.
- Мүнөөдэрэй байдалаар һурагшадые нэмэлтэ һуралсалда хабаадуулха түсэбөө үлүүлэн дүүргээбди. «Залуушуул ба хүүгэд» гэһэн үндэһэтэнэй түсэлөөр 2030 он болотор үхибүүдэй 87 хуби нэмэлтэ һуралсалда хабаадуулха гэжэ түсэблэгдэһэн байна. Бидэ 2024 оной дүнгөөр һурагшадай 91 хуби хабаадуулаабди, - гэжэ Валерий Поздняков хөөрэбэ.
Буряад Уласта 2019 онһоо 2024 он болотор үхибүүдые хүгжөөлгын нэмэлтэ программануудые бэелүүлхэ зорилготойгоор болбосоролой 12 эмхидэ 2300 шэнэ һуури байгуулагдаа. 13,7 сая түхэригэй интерактивна панельнүүд, компьютерна, тамирай ба хүгжэмэй түхеэрэлгэнүүд абтаа.
Нютаг можын «Залуу мэргэжэлтэд» түсэл бэелүүлэгдэжэ, мэргэжэлээр урид бэлдэлгын түб нээгдээ. Түбэй база дээрэ Авиационно завод, Приборостроительна нэгэдэл, Россиин түмэр харгы ба Сбербанк һурагшадтай хүдэлнэ. Үхибүүдэй талаан бэлиг хүгжөөхэ талаар Технопарк, һургуулиин гурбан Кванториум, мобильна маягай хоёр кванториум, найман «IT куб», эрдэмэй коллаборациин 2 байшан нээгдээ.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
