Улаан-Баатарта Илалтын 80 жэлдэ зорюулагдаһан хэмжээ ябуулганууд үнгэргэгдэхэ

Мартын 20-до Улаан-Баатарта Буряад Уласай Засагай газарай делегациин хабаадалгатай суглаан үнгэргэгдэбэ. Тус суглаанда Буряадай Засагай газар Илалтын 80 жэлэй ойн баярта зорюулагдаһан хамтын һайндэр тухай дурадхалнуудые оруулба. Улаан-Баатар хотын гүйсэдхэхы засагай толгойлогшо Нямбаатар дурадхалнуудые дэмжэбэ.

- Монгол гүрэн илалтада туйлай ехэ хубитаяа оруулаа. Монгол Советскэ Союзтай хамта Гитлерта дай соносхоһон дэлхэйн түрүүшын гүрэн. Дайнай үедэ адуу, мяха, дулаан хубсаһа эльгээжэ туһалаа. Хүршэ гүрэнэй арад зоной суглуулһан мүнгэн зөөрёор 53 танк бүтээгдэһэн байна, тэдэнэй зариманиинь Берлин хүрэтэр ошоо. Бидэ хамтын баян түүхэтэйбди, тэрэнээ ургажа ябаа үетэндэ дамжуулха хэрэгтэй, - гэжэ Буряад Уласай Толгойлогшо Алексей Цыденов хэлэбэ.

Буряад Уласай Засагай газарай дурадхаһан хэмжээ ябуулгануудай тоодо шэн зоригой хэшээлнүүд, элдэб акцинууд, «Илалтын үйлэ хэрэг халан абагшад» Вальс», «Георгиевско лентэ», «Дурасхаалай харуул», Монголой ба Буряад Уласай уран һайханай коллективүүдэй тоглолто, һурагшадай хоорондо волейболоор турнир, мүрысөөнүүд, гэрэл зурагай үзэсхэлэнгүүд гэхэ мэтэ. Тиихэдэ оюутадаар андалдаха болбосоролой программа бэелүүлэгдэхэ. Оюутад дурасхаалай газарнуудаар ябаха, Агууехэ Эсэгын дайнай 80 жэлдэ зорюулагдаһан хэмжээ ябуулгануудта хабаадаха.

- Шэн зоригой хэшээлнүүдтэ совет-монгол сэрэгшэдэй япон милитаристнуудые бута сохиһон тухай залуушуулда хөөрэхэ дурадхал орулнабди. Тиихэдэ Агууехэ Эсэгын дайнай үедэ монгол арадай үзүүлһэн туһаламжа, бүхы дэлхэйдэ, Росси ба Монгол гүрэнүүдтэ 1945 оной илалтын удха шанар тухай хөөрэхэ хүсэл бии. Дурасхаалай харуул эмхидхэхэ, хүшөөнүүдтэ зула бадарааха, тэрэ тоодо маршал Георгий Константинович Жуковта зорюулагдаһан, Зайсан-Толгойн хүшөөнүүтэ, - гэжэ Буряад Уласай Толгойлогшын ба Засагай газарай Захиргаанай Хүтэлбэрилэгшын мэдээсэлэй политикаар, олониитэтэй холбоогоор ба олониитын түсэлнүүдээр орлогшо Ирина Доржиева тэмдэглэбэ.

Буряадай драмын академическа театр үнгэрэгшэ зуун жэлэй 40-өөд онуудта болоһон үйлэ хэрэгүүдэй амиды гэршэнэр тухай «Фронт» гэжэ видеофильм буулгажа байна. СССР гүрэндэ дамжуулха туһаламжын эд бараа абаашалсаһан Монголой делегациин гэшүүн Цэгмид, Халхын Голой дайшалхы үйлэ хэрэгүүдэй ветеран Цэрэнгийн Чимэдцэрэн тухай хөөрэһэн фильм Улаан-Баатарта харуулха дурадхал ороо. Буряад-монгол AIST Global теле-субаг һурагшадай ба ажалай коллективүүдэй хабаадалгатай «Илалта магтан дуулая» гэжэ шүлэгүүдэй ба дуунуудай конкурс үнгэргэхэ гэжэ Ирина Доржиева нэмэбэ.

Монголой ниислэл Улаан-Баатар хотын толгойлогшо Нямбаатар Буряад Уласай дурадхалнуудые эмхидхэлэй ба мэдээсэлэй талаар дэмжэхэ байһанаа мэдүүлээ.

- Улаан-Үдэдэ, Улаан-Баатарта үнгэргэгдэхэ Агууехэ Илалтын 80 жэлэй ойдо зорюулагдаһан хамтын хэмжээ ябуулгануудай асуудалнуудаар бэе бэеэ ойлгосолдообди, - гэжэ Улаан-Баатарай толгойлогшо тэмдэглээ.