Буряад Уласай 20 багша хоёр сая түхэриг абаха аргатай

2019 онһоо хойшо 118 багша холбоото уласай «Земский учитель» программада хабаадаа. 2027 он болотор тус программаар 68 квото (2025 ондо - 20, 2026 ондо - 23, 2027 - ондо 25) хараалагданхай. Буряад Уласай Болбосоролой болон эрдэм ухаанай яаманай мэдээсэһээр, математикын, хари хэлэнэй ба физикын багшанар илангаяа дуталдана.

Буряад Уласай Болбосоролой болон эрдэм ухаанай сайд Валерий Поздняковой тэмдэглэһээр, Буряад Уласта программа «Болбосорол» гэжэ үндэһэтэнэй түсэлэй хэмжээндэ 2020 онһоо бэелүүлэгдэжэ эхилээ һэн. Саашадаа «Һурган хүмүүжүүлэгшэд ба залан хүтэлэгшэд» гэжэ холбоото уласай түсэлэй хэмжээндэ 2030 он болотор үргэлжэлүүлэгдэхэ.

- Үндэһэтэнэй «Залуушуул ба үхибүүд» түсэлэй «Һурган хүмүүжүүлэгшэд ба залан хүтэлэгшэд» гэжэ холбоото уласай түсэлөөр бүхы программануудые үргэлжэлүүлхэбди. Класс хүтэлэгшэдтэ Юрэнхылэгшын тогтооһон түлбэринүүд байха, «Земский учитель» программа ябуулагдаха, һургуулинуудта ба дунда мэргэжэлэй эмхи зургаануудта «Навигаторы детства» программаар мүнгэн түлэгдэхэ. Мүнөө жэлдэ хүдөөгэй һургуулида хүдэлхэеэ ерэһэн 20 багша хоёр сая түхэригэй түлбэри абаха, - гэжэ Валерий Поздняков хөөрэбэ. Тэрэнэй тэмдэглэһээр, улас дотор багшанар дуталдана. 2024 ондо 264 сүлөө һуури байгаа.

Энэ бэрхэшээл усадхахын тула Буряад Уласай Болбосоролой болон эрдэм ухаанай яаман Россиин Зүүн зүгые хүгжөөлгын яамантай хамта Буряадай ехэ һургуулида багшын мэргэжэлэй һууринуудые олон болгохо ажал ябуулаа. 2019 ондо 121 һуури байһан һаа, 2025 ондо 250 хүрэтэр дээшэлээ. Тэрээнһээ гадуур 2021 онһоо хойшо тусхай зорилготой хэлсээгээр һуралсал эмхидхэгдэнэ. Жэл бүри 50 һуури уласай мүнгэн зөөрёор хангагдана. Мүнөө иимэ хэлсээгээр 131 оюутан һурана.

- 12 сая түхэриг мэргэжэл дээшэлүүлгэдэ, дабтан бэлдэлгэдэ һомологдоно. Багшын мэргэжэлгүй зониие һурганабди, тиихэдэ хоёрдохи мэргэжэл багшанар абаха аргатай. Жэшээнь, географиин багша биологи зааха бэлэдхэл гарана, - гэжэ Валерий Поздняков мэдээсэбэ.

Буряад Уласай Болбосоролой болон эрдэм ухаанай сайдай хөөрэһөөр, бүхы нютагай байгууламжануудта залуу багшанарта нэмэлтэ түлбэри (30 %) хараалагданхай. Тэрээнһээ гадуур залуу багшанар нэгэ удаа үгтэдэг түлбэри абана. Эгээ ехэ түлбэри - 200 000 түхэриг  Баунтын аймагта тогтоогдонхой.

Тэмдэглэхэдэ, «Земский учитель» программада хабаадаха мэдүүлгэнүүд 2025 оной апрелиин 10-һаа июлиин 10 болотор абтана. Тодорхой мэдээсэл Буряад Уласай Болбосоролой болон эрдэм ухаанай яаманай https://egov-buryatia.ru/minobr/activities/napravleniya-deyatelnosti/zemskiy-uchitel/ сайтда харахааар.