491
Буряад Уласта үерэй хойшолонгуудые усадхалгын ажалнууд үргэлжэлһөөр. Мартын 25-най байдалаар хоёр һууринда уһан тогтонхой, гэрнүүд уһанда абтаагүй. Ивалгын аймагай Сотниково болон Тарбагатайн аймагай Пестерово тосхонуудта ехэ уһанай хойшолонгуудые усадхаха ажал ябуулагдаһаар. Энээн тухай Буряад Уласай Засагай газарай Түрүүлэгшын орлогшо Иван Альхеевэй ударидалга доро үнгэргэгдэһэн оперативна штабай зүблөөндэ мэдээсээ. Штабай зүблөөндэ үерэй талаар эрхэ байдал усадхаха асуудал харагдаа. Һайрамай уһанда долоон аймагай 17 һууринда хоёр гэр, 92 участок уһанда абтаа. Ивалгын, Бэшүүрэй, Байгал шадарай, Мухаршэбэрэй аймагуудта онсо гурим оруулагдаа. Үерэй хойшолонгуудые усадхаха талаар аймагуудай ба нютагай байгууламжануудай захиргаанууд ажал ябуулна: 220 метрэй зайда харгы заһабарилагдаа, уһанда абтаһан участогуудые уһанһаа сүлөөлөө, 700 гаран тонно элһэтэй ба шулуутай газар оруулагдаа. Дүн хамта 136 хүн, олон тоото техникэ хойшолонгуудые усадхаха ажалда хабаадуулагдана.
Сухара гол эрьеһээ халижа, Мухаршэбэрэй аймагай Хүһөөтэ һууринаар гарадаг харгы уһанда абтаа. Тэрээнһээ боложо, һууринай нэгэ талада автомобильна холбоо таһараа. Мүнөө үедэ ой соогуур томо машинануудай гараха харгы зохёогдоо
Мухаршэбэр-Суулга-Подлопатки һууринуудаар гарадаг авто-унаануудай харгы зубшаһан һубаг зохёогдоо. Энэ харгыгаар машинанууд саг зуура ябанагүй. Ажаһуугшадта энээн тухай дуулгагдаа, тиихэдэ харгын тэмдэгүүд тодхогдоо. Мүнөө уһан бага боложо эхилээ. Удахагүй аймагай захиргаан уһанда абтаһан харгы һэргээхэ ажал ябуулха. Мухаршэбэр, Шэнэ Заган нютагуудта харгынуудые бүхэлхэ талаар ажал хэгдээ.
- Бэеэ һула табихань үшөө эртэ. Ажаһуугшадай тогтонижоһон байдалдаа бусахын тула, бүхы ажал дүүргэхэ шухала, - гэжэ Иван Альхеев тэмдэглээ.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
