Диктант бэшэе!

Буряад Уласта хэдэн жэлэй туршада бүгэдэ ниитын диктантые “Ариг Ус” телекомпани эм­хидхэдэг заншалтай байһан. Байгша онһоо тэрээндэ “Бу­ряад үнэн” Хэблэлэй байшан хамтарба.

Хэблэлэй байшангай за­хирал ба ахамад редактор Даши-Доржо Болотов дик­тантын текстые буряад хэлэн дээрэ оршуулха үүргэтэй. Мүн лэ тэрэ диктантые ун­шан ябуулагша дикторээр томилогдоһон. Даши-Доржо Найманович энэ шуха­ла хэмжээн тухай иигэжэ һанамжаараа хубаалдана:

- Би буряад хэлэнэй баг­ша мэргэжэлтэйб, теэд багшаар хэзээдэшье ажаллаагүйб. Тиигэбэшье, орёо түбэгтэй юумэ харанагүйб. Минии һанамжаар, буряад хэлэн дээрэ диктант бэшэхэ­дэ, ехэ хэсүү бэрхэтэй бэшэ. Манай уласта һайнаар буряад хэлэеэ мэдэдэг, унша­даг ба бэшэдэг хүнүүд олон.

Инесса Скосырская, “Ариг Ус” телекомпаниин генеральна захирал:

- Диктантда хабаада­жа, өөрынгөө эрдэм мэдэ­сые шалгахада, хүн бүхэндэ һонирхолтой ха юм. Иланга­яа жэл бүри тус диктантда хабаададаг хүнүүд магтаал­тай. Тэдэнэр тусхай зориг хүсэлтэйгөөр бэеэ бэлдэжэ, үргэлжэ эрдэм мэдэсэеэ дээшэлүүлжэ, дүримүүдые дабтажа, болбосоролой та­лаар хүгжэнги зон гэжэ эли.

Буряад Уласай Үндэһэтэнэй номой сангай захи­ралай нэгэдэхи орлогшо Татьяна Митрофановагай тэмдэглэһээр, буряад хэ­лэн дээрэ диктант номой сангай байшангай хоёрдо­хи дабхарта, конференц- танхимай талмайда апре­лиин 5-да 13 сагта эмхидхэгдэхэ. Энэ тусхай түхеэрэлгэ тоноглолтой танхим соо ямаршье арга болом­жонуудтай хүнүүд диктантда хабаадаха аргатай. Тэдэнэй тоодо хүдэлхэ ябахын тала­ар хизаарлалтатай зондо ядамаргүй, тааруу зохид бай­дал тогтоогдоһон.