Хурамхаанай аймагай түбэй больницын эмшэн: «Нютагаа бусаха тухай ходо һанадаг һэм»

Екатерина Будаева – үхибүүдэй эмшэн, ультразвугай туһаар үбшэ элирүүлдэг аргашан, эмнэлгын эрдэмэй кандидат. 2024 ондо тэрэ «Земский доктор» программаар Хурамхаан һуурин зөөжэ ерээ.

Екатерина Капитоновна РУДН-нэй эмнэлгын таһаг дүүргээд, педиатриин ординатурада ороһон байна. Удаань Москва хотын нарайлалгын газарта педиатраар хүдэлөө. Басаганайнгаа багахан байхада, неонатологиин кафедрада һуралсалаа үргэлжэлүүлээ. Тэндэ һуража байхадаа, амжалтатайгаар диссертации хамгаалаа.

Аспирантура дүүргэһэнэй удаа Улаан-Үдэ ерэжэ, Буряад Уласай Хүүгэдэй клиническа эмнэлгын газарта УЗИ-н ахамад аргашанаар, неонатологоор хүдэлөө, хүүгэдтэ эмнэлгын туһа үзүүлхэ талаар ехэ дүй дүршэлтэй болоо. 2018 ондо педиатраар хүдэлхын хажуугаар УЗИ-н аргашанаар ажалаа үргэлжэлүүлээ. 2020 ондо басагантаяа Санкт-Петербург ошожо, үхибүүдэй поликлиникэдэ ажалтай болоһон байна. 2023 ондо Улаан-Үдэ бусажа, УЗИ-н аргашанаар ажалаа үргэлжэлүүлээ. Харин 2024 оной февраль һарада халдабарита үбшэнүүдэй больницын угтан абалгын таһагай эмшэнээр хүдэлжэ эхилээ. 2024 оной октябрь соо «Земский доктор» программаар Хурамхаанай аймагай түбэй эмнэлгын газарта ажалда ороһон байна.

- Юундэ хүдөө һуурин руу зөөжэ ерээбши гэжэ олон хүн намһаа һурадаг. Үнэн дээрээ олон шалтагаан бии, тэдэнэй нэгэн - түрэһэн нютагаа бусаха хүсэл. Нютагтаа 5 һараһаа үлүү ажаһуужа байнаб, эндэ намайе ехэ дулаанаар угтан абаа. Аймагай захиргаан Леонид Борисович Будаевай хүтэлбэри доро намда болбосон түхэлтэй гэр байра үгөө. Түсэбүүд угаа олон. Тэдэнээ бэелүүлхые оролдохоб, - гэжэ Екатерина Капитоновна хубаалдаба.

Мүнөө Екатерина Будаева «Шанг-Шунг» институдай түбэд эмнэлгын уласхоорондын һургуулида һурана. Тэрэ бага наһанһаа хойшо түбэд эмнэлгын эмшэн болохо хүсэлтэй байгаа.

Һануулхада, элүүрые хамгаалгын эмхи зургаануудые мэргэжэлтэдээр хангаха гээшэ үндэһэтэнэй «Эдэбхитэй ута наһан» түсэлэй шухала шэглэлнүүдэй нэгэн болоно. Энэ түсэл Россиин Юрэнхылэгшэ Владимир Путинай үүсхэлээр бэелүүлэгдэнэ.