450
Санкт-Петербургын Сергей Пономарев «Алас Дурна - уршагта ябадалнуудай орон» гэжэ конкурсдо Буряадай Ахын аймагта оршодог Кропоткиной шэлээр үбэлэй сагта аяншалһан тухай видео эльгээгээ. Урид энэ газараар санаар аяншалагшад нэгэшье ябажа үзөөгүй гэжэ автор хубаалдаа. Сергей Пономарев бүлгэмтэеэ 16 үдэрэй туршада 236 км зай гаталжа, байгаалиин гоё һайхан газарнуудые нээгээ. Жомболок голой хүндыһөө тэдэнэй зам эхилжэ, уһанай хүүюурнүүдтэй олон тоото гүнзэгы нарин жалга хүндынүүдээр, хабсагайн оройнуудаар үргэлжэлөө. Замайнгаа эсэстэ аяншалагшад Аха голой хүндыдэ оршодог Орхо-Бом уулын хабшалда хүрөө. Экспедици Кропоткиной шэлын бооридо оршодог Хужир һууринда түгэсөө.
- Энэ санаар газар үзэлгын юрын аяншалга бэшэ, харин үбэлэй ёһотой экспедици болоно, - гэжэ автор тэмдэглээ.
Фильм “зэрлиг” байгаалиин гоё һайханиие харуулхаһаа гадна үбэлэй сагта аяншалгада хабаадагшадай эрид хатуу зан харуулна. Саһаар хушагдаһан жалга хүндынүүдтэй, хүрэһэн хүүюурнүүдтэй, цивилизацииин мүргүй хада уулануудтай, Аха нютагай газарай элдэб нюруу түхэлнүүдтэй фильм танилсуулна.
Сергей Пономаревой ролик, Буряад ороноор аяншалга тухай бусад хүдэлмэринүүдые Telegram каналда хараха аргатайт ( https://t.me/travelerdv/3049)
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
