Елена Плюснина «Земский фельдшер» программаар Дэрэстэй һуурин эмшэнээр ошобо

Елена Плюснина Зэдын аймагай Дэрэстэй һуурин зөөжэ ерэбэ. Тэрэ ФАП-та фельдшерээр хүдэлхэ юм. Һуурин  549 ажаһуугшадтай, тэдэнэй 143-ниинь үхибүүд. Елена Плюснина эмшэн болохо шиидхэбэри һургуули дүүргэхэ сагтаа абаһан байна.

- Сэлэнгын медучилищи дүүргэһэнэй удаа 20 гаран жэлэй туршада Зэдын амбулаторидо түргэн туһаламжын фельдшерээр хүдэлөөб. Түрэһэн нютагһаа зарим ушар шалтагаанаар гаража ошохо баатай болоо һэм. Гүрэнэй программа тухай дуулаад, хүдөө һуурин руу дуратайгаар хүдэлхэеэ ерээб. Эндэ хүн зониинь һайн һанаатай, байгаалинь аргагүй гоё. Олон ажаһуугшадтай гэрээрнь ябажа танилсааб, - гэжэ Елена Плюснина хөөрэбэ.

Елена Валерьевна ажалдаа ехэ дуратай. Эмшэн бүхэн юумэ һайн мэдэхэ мэргэжэлтэн байхаһаа гадна үбшэнтэдтэй хөөрэлдэжэ, харилсажа шадаха ёһотой.

 - Харилсаанайл аргаар үбшэн тухай мэдээ суглуулагдадаг. Зарим зон харилсаха, һониноороо, амжалтануудаараа хубаалдаха дуратай байдаг, өөрынгөө ажабайдал тухай хөөрэдэг, асуудалнуудые табидаг. Эмшэнэй урин хандаса, анхарал олон үбшэнһөө аргалдаг ха юм. Манай мэргэжэлдэ гүрэнэй ба элүүрые хамгаалгын яаманай талаһаа анхарал хандуулагдажа, бидэниие дэмжэжэ байһандань баяртайб. Намайе дулаанаар угтан абаһан хүтэлбэрилэгшэдтэ баяраа мэдүүлнэб, - гэжэ тэрэ хубаалдаба.