«Буряадай патриодууд» программада мэдүүлгэнүүдые абажа дүүрэбэ

Программын эхилһээр сэрэгэй тусхай үйлэ хэрэгүүдэй ветерануудһаа 471 мэдүүлгэ абтаба.  Февралиин 28-һаа хойшо ветеранууд саарһа дансаяа суглуулжа, «Буряадай патриодууд» программада хабаадаха хүсэлөө мэдүүлбэ.

Программа болбосоролой дүрбэн модульһоо бүридэнэ. Хэшээлнүүд Буряадай гүрэнэй Доржи Банзаровай нэрэмжэтэ ехэ һургуулида үнгэргэгдэхэ. Хүтэлэн ябуулагшадай ба багшанарай тоодо Буряад Уласай һунгамалнууд ба сайдууд ороно.

Амжалтатайгаар һуража гараһан ветеранууд гүрэнэй ба нютагай засагай органуудай, томо үйлэдбэринүүдэй, олониитын эмхи зургаануудай хүтэлбэрилхы тушаалнуудта дэбжүүлэгдэхэ. Программын олониитын зүблэлэй гэшүүд июнь һарада эхилхэ һуралсалай курсда эрхимүүдые шэлэн абаха.