Буряад сэдьхэлтэй дангина

Галина түрүүшынхиеэ бэшэ иимэ хэмжээ ябуулгада хабаадана. Урда жэлнүүдтэ бэлиг талаангаа харуулжа, гол шангуудта хүртэһэн габьяатай. “Миссис Креа­тивность-2022”, “Миссис Достояние Республики Бурятия-2022”, “Супер Модель-2022” гэһэн шэглэлнүүдээр гоо һайхан дангинанарай дунда оролсоһон юм. Харин мүнөө жэл “Мисс Королева Земного шара-2025”, “Вице-миссис Красавица Земного шара-2025” гэһэн шангуудые нэмээ.

- Эхэнэр хүнэй хэдытэйшье байха­да, хаанань бэ даа - зосоонь багахан, аляахан басаган хоргодоод һуудаг. Хэды наһатай болобошье, тайзан дээрэ гараха, гоо һайхан дангинанарай урилдаанда хабаадаха, гоё һайхан тэтим үмдэхэ һанаан сэдьхэл доторнь байдаг ха юм. Эдэ конкурснууд иимэ арга боломжо олгуулна. Бишье баһа һанаһандаа хүрэбэб. Юуб гэхэдэ, үндэр бэетэй хүн байнаб. Тиимэһээ басагадаар хөөрэлдэхэдөө, доошоо тонгойхош, бүгтэгэр нюргатай боло­шооб. Нюргаяа сэхээр баряад яба­ха гэхэдэшни, хамараа үргөө гэжэ абаһаар лэ хүнүүд хэлсэхэ. Тус кон­курснуудта хабаадажа, сэхээр ябажа һурааб, үндэр һүеытэй гутал үмдөөд ябадаг болооб, - гэжэ Галина Жерба­кова хөөрэнэ.

Эдэ болон бусад шалтагаануудһаа боложо, 2022 ондо Галина Жерба­кова наһанайнгаа ажабайдалай ябаса эрид һэлгээ. Тиигэжэ тэрэ түрүүшынгээ конкурсдо абаһаар лэ ехэ амжалта туйлаа.

Гэр бүлын дэмжэлгээр

- Һайхан плати оёхо гээд, хадам эжы - Сэсэг Сандыновна Жербакова­тай зураг хэжэ һуугаабди. Иимэ гоё плати дээрэ толгойдоо юу үмдэхэб гэжэ һанажа байтараа, таһалга соохи люстра харажархёобди. Хадам аба нэгэ заа гэмэрээд, тэрэ һайхан люстрэеэ абажа, малгай болгожо үгөө һэн. Иигэжэ минии гэр бүлэ, өөрымни эжы - Роза Нимаевна, наһанаймни нүхэр Саян Валерьевич, Милана, Артём, Даяна хүүгэдни на­майгаа дэмжэнэ. Булта туһалжа бай­даг, - гэжэ Галина Николаевна урма­тайгаар хөөрэнэ.

Энэшье жэлэй конкурсдо ха­дам эжынь платииень оёлсоо. Бу­ряад Уласай тугай үнгэтэй юбкатай хубсаһаниинь олониие гайхуулаа. Юуб гэхэдэ, мүнөө жэлдэ энэ хэм­жээ ябуулгада хэзээ хэзээнэйхиһээ олоор эхэнэрнүүд хабаадаһан байна. Эгээл эдир дангина оройдоол гурба наһатайхан байгаа, мүн тиихэдэ 65 наһатай эхэнэр эндэ хабаадалсаа. Тус конкурс наһанай дүрбэн бүлэгтэ үнгэргэгдөө.

- Конкурснай нэгэ һарын хуга­саада эмхидхэгдээ. Тон түрүүн бүхы хабаадагшад нэгэ доро уулзажа танилсаһан байна. Эмхидхэгшэдтэ хүн бүхэн багахан гарай бэлэг бэл­дээ. Бообо хэдэг хэб баряаб. Роза Нимаевна эжымни намайе бообо бэлдэжэ һургаа һэн. Нэгэ һарын ху­гасаада амаралтые амаралта гэнгүй бэлэдхэл болоо, элдэб мастер-клас­суудта хабаадаабди. Иимэ газараар ябаад, олон эхэнэрнүүд өөрын онсо шэнжэтэй болоно. Нумерологиин хэшээлнүүдые абаһан нэгэ эхэнэр тэрээндэ дэлгэрэнгыгээр һураад, мүнөө үедэ олзотой болоо. Зарим ба­сагад өөһэдынгөө хэжэ байһан ажал орхёод, хюмһа, макияж, массаж хэ­дэг болонхой. Иимэ жэшээнүүд олон, - гэжэ Галина Николаевна мэдүүлнэ.

Сэхэ гоёор ябалга, бэеын хүдэлгэсэ конкурсдо онсо һуури эзэлнэ. Бо­дото дээрээ шүүгшэд хабаадагшадай үндэр набтарые, тарган туранхайе тиимэ ехээр сэгнэнэгүй. Энээгээр лэ конкурс олондо һайшаагдана.

- Хатарай шатада яһала үни бэлдээб. Минии шаби хүбүүд, баса­гад намда туһалаа. Элдэб хатарай бүлэгүүдтэ һураһан хатарнуудаа намда харуулан һургаа. Харин би тэ­дээниие физикэ, тоо бодолго, инфор­матикаар гүрэнэй шалгалтануудта бэлдэнэб, - гээд, дангина мэдүүлнэ.

Һарын туршада бэлдэһэнэй удаа энэ урилдаан үглөөнэй юһэн часһаа үдэшын орой болотор эмхидхэгдээ. Энэ сагта эсэһэн сусаһанай сэн ха­даа амжалта болоо. Галина Никола­евна ээлжээтэ тэтимдэ хүртөө.

- Түрүүшымни тэтим бага басаган Даяна абашоо. Удаадахи тэтимыем­ни ехэ басаган буляагаа. Эгээл энэ гурбадахи тэтимни одоошье минии болохонь хаш, - гэжэ Галина энеэб­хилнэ.

Бага наһандаа шэлээ

Галина Николаевнагай хуби за­яанай хуудаһанууд һонирхолтой, за­рим газарта гайхалтайшье.

Николай Петрович Федосенко Хяагта хотодо сэрэгэй алба хаахаяа эльгээгдэһэн байна. Һайхан буряад басаган Роза Нимаевна Очирова­тай танилсажа, бүхыгөөрөө дурла­шоо һэн. Һонирхолтойнь гэхэдэ, тэрэ үедэ Роза Нимаевна табан хүбүүдые үндылгэжэ байгаа. Хоёр зүрхэнэй дунда һүжэрһэн шанга дуранай ашаар Галина энэ дэлхэй дээрэ мүндэлөө бэлэй. Одоошье басаганай гарахада, бүхы гэр бүлэнь баярлаа, табан аханарынь дүүхэнээ дуратай­гаар үргэлсөө.

- 7-дохи класс хүрэтэр хүүхэлдэйгээр наадагша һэм. Дурлаһан нааданхайнуудые абуулжа, амта­тай эдеэнэй дээжые амсажа, эрхэ­лэн үндыгөөб. Гэртэ газаагаа юушье хэнгүй, ганса һургуулида амжал­татайгаар һураа һэм, - гэжэ Галина мэдүүлнэ.

Хяагта хотын 3-дахи һургуулида 1-10-дахи классуудта һураа. 2006 ондо 11-дэхи класста һурахаяа Гали­на гэнтэ Алтай һууринда өөрын ду­раар ябашоо бэлэй.

- Эжымни абатай сула ородоор хөөрэлдэдэг һэн. Харин хүбүүдээрээ буряадаараа зугаалдахал даа. Би ехэ һонирхогшо бэлэйб, намайе буряад­та һургагты гэжэ хэлэдэг байһанаа һанадагби, - гээд, Галина Жербакова һанан дурсан хөөрэнэ.

Үхибүүн ябаад, зунай лагерьта амархадаа, бусад хүүгэдтэй буряадаар хөөрэлдэжэ һурахаяа шамдаг­ша бэлэй. Эгээл тэндэ Баир Базаро­вич Батуевтай танилсаа. Тэрэ лаге­риин захиралаар хүдэлөө. Удаань Алтайда һургуули дүүргэхэдээ, Баир Базарович Екатерина Бальжинима­евна хоёрой гэр бүлэдэ түбхинөө.

- Алтай һууринай бүхы арад зон буряад соёлдоо, заншалдаа дуратайгаар хандадаг гэжэ ойл­гооб. Һургуулиин буряад арадай зэмсэгүүдэй ансамбль, буряад бүхэ барилдаанай секци - нютагай омо­горхол гээшэ. Волейболшье эндэ бэрхээр наададаг. Харин би шал­галтануудта бэлдэжэ, гар бүмбэгын наадануудта хабаадаагүйб. Эгээл Алтайда буряад эдеэ хоол бэлдэ­жэ, ятага дээрэ наадажа һурааб. Түрүүшынхиеэ тайзан дээрэ гаража туршааб. Нэгэ дахин буряад хубсаһа үмдөөд, модель болоод харуулааб. Шэнэ жэлэй һайндэрые хүтэлөө һэм. Үшөө нэгэ жэл эндэ ажаһуубал - тон һайнаар буряадаар дуугаржа эхил­шэхэ байгааб гээд һанагдана. Минии хүгжэлгэдэ Баир Базарович Екате­рина Бальжинимаевна хоёрой үүргэ ехэ, - гэжэ Галина басаган хөөрэнэ.

Һургуули дүүргэһэнэй удаа Бу­ряадай гүрэнэй дээдэ һургуулида һуража, физикын болон инфор­матикын багшын мэргэжэлтэй бо­лоо. Удаань математикын багшада һураа. Түрэл Хяагта хотынгоо 3-дахи һургуулида хүдэлһэн намтартай.