Буряад Уласай Муяын аймагта харгы барилгын албанай бааза баярай оршондо нээгдэбэ

Хэмжээ ябуулгада Муяын аймагаар албанай хэрэгээр ябаһан Буряад Уласай Унаа тээбэри, элшэ хүсэ ба харгын ажахы хүгжѳѳлгын талаар сайд Александр Гоге хабаадаба. Үйлэдбэриин талмай үшөө үнгэрэгшэ жэлдэ хүдэлжэ эхилһэн байна.

Бааза тусхай техникэ хадагалха, заһабарилха, техническэ харууһа хэхэ мүнөө сагай эрилтэдэ таарама байратай, өөрын заправочна станцитай, бэеэ дааһан подстанцитай. Ажалшадай байха вагонууд, эдеэнэй газар, харгын барилгада хэрэгтэй материалнуудай склад, офис эндэ бии.

Мүнөө Буряадай харгы барилгын албан Муяын аймагай 204,2 км утатай харгы хангаха, заһабарилха үүргэтэй.

- Тус албан үнгэрэгшэ жэлдэ Буряадай Толгойлогшо Алексей Цыденовэй даабаряар байгуулагдаа һэн. Мүнөөдэрэй байдалаар эмхи авто-унаагай харгы, хүүргэнүүдые  хангахаһаа гадна заһабарилгын ажалнуудые ябуулдаг. Энэ жэлдэ 130 сая түхэриг аймагай харгын ажалнуудта хараалагданхай, - гэжэ Буряад Уласай Унаа тээбэри, элшэ хүсэ ба харгын ажахы хүгжѳѳлгын талаар сайд Александр Гоге тэмдэглээ.

Мүнөө тус албанда ажалай 37 һуури тоологдоно, тэрэ тоодо юһэн сүлөө һуури. Албанай мэдэлдэ 12 тусхай техникэ бии. 2025 ондо хэдэн шухала хэмжээ ябуулганууд түсэблэгдэнхэй, тэрэ тоодо асфальтобетонно заводой, бутаруулгын ба илгалгын, асфальтаар хушалгын комплекснүүдэй нээлгэ.

- Тиихэдэ Ковокта, Дяпкар, Итыкит голнуудай хүүргэнүүд заһабарилагдаха, Северобайкальск – Шэнэ Уоян – Таксимо трассын 275-283 ба 290-292 километртэ участогуудые заһабарилха саарһа данса хэжэ эхилхэ түсэбтэйбди. Гадна шэгнүүрэй хиналтын пунктын талмай баригдаха, - гэжэ  Буряад Уласай Харгы барилгын албанай хүтэлбэрилэгшэ Александр Прокофьев хэлэбэ.

Баазада эндэхи нютагай ажаһуугшад хүдэлнэ.

 - 6.30-да бодожо, үглөөнэй хоол баряад, бэеэ шалгуулаад, бааза руу даабари абахаяа ошодогби. Саһа бороогой ороходо, нэн түрүүн тосхоной харгынуудые  заһадагбди. Таксимо-Бодайбо трасса 40 км шахуу утатай, Янчукан, Усть-Муя тосхонгууд хүрэтэр ошодогбди, - гэжэ харгын машина хүтэлэгшэ Сергей Апрелков хөөрэбэ.

Һануулхада, Буряад Уласай хойто зүгтэ харгы заһабарилха хүсэлтэй подрядна эмхиин үгы дээрэһээ гүрэнэй албан байгуулагдаа.