Буряад Уласта фенол суглуулдаг газар усадхалгын асуудалаар ажал үргэлжэлһөөр

Апрелиин 2-то Буряад Уласай Засагай газарай Түрүүлэгшын орлогшо Евгений  Луковниковой ударидалга доро Улаан-Үдэдэ фенол суглуулдаг газар усадхалгын асуудалаар суглаан үнгэргэгдэбэ. Суглаан дээрэ Россиин Эрдэм ухаанай академиин Зүблэлэй тус объект тухай тобшолол, түһөө түсэбэй саарһа данса бүтээлгэ, абтаһан шиидхэбэринүүд тухай зүбшэн хэлсээ.

- 2025 оной декабриин 1 болотор түһөө түсэб дүүргэхэ ёһотойбди. Тиигээд объект усадхалгын удаадахи шатада гарахабди, - гэжэ ажадай бүлгэмэй түрүүлэгшэ, Буряад Уласай Засагай газарай Түрүүлэгшын орлогшо Евгений  Луковников тэмдэглэбэ.

Һануулхада, 2023 оной ноябрь һарада  «Желдорреммаш»,  «Холбоото уласай байгаали хамгаалгын оператор» гэжэ эмхинүүд түсэлэй саарһа данса бэлдэлгын, инженернэ шэнжэлэлгын хэлсээ баталһан байна. Россиин эрдэм ухаанай академиин Зүблэлэй суглаан дээрэ фенол суглуулдаг газар усадхаха ажалнуудай түхэл янза шэлэгдээ.

- Холбоото уласай байгаали хамгаалгын оператортай хамта Красный Бор, Усолье-Сибирское, БЦБК гэхэ мэтэ объектнүүдтэй хүдэлнэбди. Мүнөө үшөө нэгэ шэнэ объект бии болобо - Улаан-Үдын  фенол суглуулдаг газар. Эрдэмэй зүблэлэй бүридэлдэ элдэб һалбаринуудай мэргэжэлтэд ороно. Дэбисхэр сэбэрлэлгын хүдэлмэринүүдтэ Россиин Эрдэм ухаанай академи хабаадаха. Энэ тон шухала, - гэжэ Россиин Эрдэм ухаанай академиин юрэнхылэгшын орлогшо, байгаали хамгаалгын дэлхэйн хэмжээнэй бэрхэшээлнүүдээр Эрдэмэй зүблэлэй түрүүлэгшэ, академик Степан Калмыков хэлэбэ.

Объект усадхалгын гол бодол экономико, байдал,  хоро хүргэлгэ бага болгохо асуудалнуудые хараадаа абана. Ажалнууд 3 шатаар үнгэргэгдэхэ, болзорынь түһөө түсэб зохёолгын удаа элирхэ.

- Объект дээрэ олон жэлэй туршада хэгдэһэн ажалай дүн шэнжэлээбди. Тиин дэбисхэр,  оршон тойронхииень сэбэрлэхэ, аюулгүй болгохо талаар үнгэргэгдэхэ хэмжээ ябуулганууд зүб шэглэлтэй, - гэжэ «РЖД» бүлгэмэй Байгаали хамгаалгын департаментын дарга Андрей Лисицын тэмдэглээ.