Буряад Уласай ажаһуугшадые анимационно киногой фестивальда хабаадахыень урина

«Анимур» гэһэн уласхоорондын IV фестиваль 2025 оной ноябриин 1-һээ 4 болотор Хабаровск хотодо үнгэргэгдэхэ. Тус хэмжээ ябуулга анимационно урлалда дуратайшуулай ёһотой һайндэр болохо. 

Урда жэлнүүдтэ Буряад ороной командын «Стою на планете» (6+) гэжэ мультфильм фестивальда хабаадажа, шангай һуури эзэлһэн байна. Буряадай ирагуу найрагша Намжил Нимбуевай шүлэг дээрэ үндэһэлэгдэн бүтээгдэһэн «Байкал Арт» студиин гэшүүдэй хүдэлмэри конкурсна программын шорт-листдэ ороо һэн.

Үнгэрэгшэ жэлэй фестивальда 102 гүрэнһөө 2300 захяа эльгээгдээ. Ноябриин 1-һээ 4 болотор 27 гүрэнэй 105 фильм дурадхагдаһан байна. Дүн хамта 200 ажалнуудтай харагшад танилсаа, тэдэнэй 63-ниинь анха түрүүшынхиеэ харуулагдаа. Дүрбэн үдэрэй туршада 7500 хүн фестивальда хабаадаа, Россиин ба гадаада гүрэнүүдэй анимационно үйлэдбэриин 40 гаран түлөөлэгшэд хэмжээ ябуулгада айлшалаа.

«СоюзМультФильм» гэһэн киностуди 2024 ондо үнгэргэгдэһэн фестивалиин генеральна холбоо нүхэр болоһон байха юм.

- Алас Дурнын тойрогто анимационно үйлэдбэри бии боложо байна. Эндэ анимационно студинүүд, һургуулинууд байгуулагдана, түсэлнүүд бэелүүлэгдэнэ. «Анимур» Алас Дурнын «Оскар» гээшэ. Тус фестиваль дүй дүршэлтэйшье, залуушье авторнуудай дура сэдьхэл буляана, эндэ соёлшод харилсахаяа сугларна, авторнууд һанал бодолоо дамжуулна, - гэжэ «Анимурай» захирал Александра Дубовская тэмдэглэбэ.     

Мүнөө жэлэй уласхоорондын конкурсдо 2023 онһоо хойшо буулгагдаһан богонихон анимационно фильмнүүд ба сериалнууд хабаадаха. Конкурсын программада Россиин, Азиин ба Номгон далайн, Зүүн Урда Азиин гүрэнүүдэй фильмнүүд шэлэгдэн абтаха. Харин дэлхэйн ондоо можо нютагуудай фильмнүүд фестивальда конкурсһоо гадуур хабаадаха.

Гран-при, шүүгшэдэй тусхай шан, эрхим найруулга, оюутадай эрхим фильм, эрхим сериал, фестивалиин эмхидхэлэй  хорооной шан гэхэ мэтэ янзануудаар хүдэлмэринүүд сэгнэгдэхэ.

Захяануудые https://animur.ru/ гэжэ фестивалиин сайт руу, Film Freeway онлайн-платформоор 2025 оной июниин 30 болотор эльгээхэдэ болоно. Эрхим хүдэлмэринүүд жэл бүриин «ДВИЖБА» гэжэ анимационно суглуулбарида оруулагдаха.