Буряад Уласай Сотниково һууринай шэнэ МФЦ албан хэрэгэй ба олониитын ажабайдалай түб болохо

Буряад Уласта нютагай байгууламжануудые болбосон түхэлтэй болгохо талаар эдэбхитэй ажал ябуулагдана. Алас Дурнын тойрогой нютагуудта тааруу зохид оршон байгуулгын эрхим түсэлнүүдэй конкурсдо илалта туйлаһан хото һууринууд һэргээгдэнэ. Конкурс Россиин Юрэнхылэгшын даабаряар, Россиин Зүүн зүгые хүгжөөлгын яаманай, Алас Дурна ба Арктика хүгжөөлгын Корпорациин дэмжэлгээр үнгэргэгдэнэ.

11 мянган ажаһуугшадтай Ивалгын аймагай Сотниково һууринда 1,7 мянган хоёролжон метрэй талмай дээрэ МФЦ баригдажа байна. Тус объект 2025 оной июль һарада нээгдэхээр хараалагдана. Түсэл «Хотын тааруу зохид оршон байгуулга» гэжэ программын хэмжээндэ бэелүүлэгдэнэ. Барилгада 150 сая түхэриг гаргашалагдаха. Холбоото уласай конкурсдо илалта туйлаһанай ашаар мүнгэн зөөри һомологдоһон байна. Конкурсын урда тээ һууринай ажаһуугшадтай үргэн дэлисэтэй ажал ябуулагдаа, тэрэ тоодо асуултанууд, олониитын шагналганууд, гадна элдэб наһанай зоной һанал бодолнуудые хараадаа абаа. Шэнэ МФЦ «Хии Морин» гэжэ нэрлэгдээ. Һууринай ажаһуугшадай хүсэлөөр захиргаанай, ниитын ба соёлой, болбосоролой гурбан модуль байгуулагдаха. Тэдэ бэе бэетэеэ холбоотой байха.

Байшанай архитектурна шарай мүнөө сагай болон үндэһэтэнэй ёһо заншалай шиидхэбэринүүдые ниилүүлнэ. Модульнуудай хоорондо зоной амарха газар, хэмжээ ябуулгануудые эмхидхэхэ амфитеатр, кафе, үхибүүдэй зурууд гэхэ мэтэ зохёогдохо.

- Барилга түсэбэй ёһоор ябуулагдана. Соёлой ба болбосоролой түб эрхим түсэлнүүдэй конкурсда илалтын мүнгэн зөөрёор хангагдана. Сотниково һууринай ажаһуугшад захяа байгуулгын үйлэ хэрэгүүдтэ эдэбхитэй оролсожо, конкурсда амжалта туйлагдаа, - гэжэ Буряад Уласай Барилгын ба гэр байрын ажахы шэнэлэлгын сайдай орлогшо Александр Маренич тэмдэглэбэ.

Алас Дурна ба Арктика хүгжөөлгын Корпорациин  ниигэмэй хүгжэлтөөр гүйсэдхэхы захирал Гасан Гасанбалаевай һануулһаар, Сотниково һууринда баригдаха МФЦ-н түсэл 2023 оной конкурсдо илажа гараһан байна. Тус конкурсдо Буряад Уласай Северобайкальск, Гусиноозёрск, Закаменск хотонууд, Кабанск ба Кырен һууринууд грантда хүртэһэн юм. 2024 ондо Онохой, Каменск ба Хоринск һууринууд холбоото уласай дэмжэлгэдэ хүртөө.

- Сотниково һууринай МФЦ-н түсэл жэшээтэ түсэл болоно. Мурманск хотодо үнгэргэгдэһэн Уласхоорондын арктическа хуралдаан дээрэ Россиин Юрэнхылэгшэ үгэ хэлэхэдээ, Арктикын дэбисхэр дээрэ олон үүргэтэ түбүүдэй  барилгын дүй дүршэл үргэнөөр нэбтэрүүлхэ хэрэгтэй гэжэ тэмдэглээ. Юрэнхылэгшын хэлэһээр, ниигэмэй ба захиргаанай эмхи зургаанууд, тамирай комплекснүүд, хангамжын һалбариин эмхинүүд  нэгэ байшан соо булта байбал, һайн. Тиимэһээ түбэй барилга, тэрэнэй ажал, һууринай ажаһуугшадта үзүүлэгдэдэг хангамжанууд шэнжэлэгдэхэ, нютаг можын онсолиг анхаралда абтаха. Тиин саашадаа Арктикын ба Алас Дурнын нютаг можонуудта. Оросой Холбоото Уласай субъектнүүдтэ түсэл үргэнөөр бэелүүлэгдэхэ, - гэжэ Гасан Гасанбалаев онсолбо.

Алас Дурнын тойрогой нютагай байгууламжануудта тааруу зохид оршон байгуулха талаар эрхим түсэлнүүдэй конкурс жэл бүри үнгэргэгдэдэг бүхэроссиин конкурсын программада ороно. Тус хэмжээ ябуулга Россиин Юрэнхылэгшын даабаряар холбоото уласай Барилгын яаман 2018 онһоо үнгэргэнэ. Оросой Холбоото Уласай Засагай газарай шиидхэбэреэр конкурс 2030 он болотор эмхидхэгдэхэ. Энэ хэрэгтэ жэл бүри 5 млрд түхэриг һомологдожо байха.

Алас Дурнын нютаг можонуудай конкурсдо 250000 хүрэтэр ажаһуугшадтай хотонууд, тиихэдэ 5000-һаа дээшэ ажаһуугшадтай хотын ба хүдөөгэй байгууламжанууд хабаадаха аргатай. Илагшад 300, 150, 100 ба 50 сая түхэригэй шангуудта хүртэхэ.