Буряад Уласта «Муравьев-Амурский» программаар һуралсалай түгэсхэлэй шата эхилбэ

2025 оной апрелиин 21-дэ Буряад Уласта «Муравьев-Амурский-2030» программаар гүрэнэй албанай ажалтадые бэлдэлгын 3-дахи һубарилай түгэсхэлэй шата эхилбэ. Энэ долоон хоногой туршада курсантнууд Алас Дурнын тойрогой нютаг можонуудые хүгжөөхэ шэглэлтэй түсэлнүүдээ ба үүсхэлнүүдээ дахин хаража үзэнэ, һэлгэлтэ нэмэлтэнүүдые оруулна.  Программын 3-дахи ээлжээндэ дүн хамта 53 хүн һурана, тэдэнэй 3-ниинь Буряад Уласай ажаһуугшад. Мүнөө программын залан хүтэлэгшэдэй нэгэн - Буряад Уласай Толгойлогшо Алексей Цыденов курсантнуудтай уулзаба.

- Һануулхада, тус программа Юрий Петрович Трутневай үүсхэлээр бэелүүлэгдэнэ. Һуралсалай программа Алас Дурнын тойрогто хүдэлхэ мэргэжэлтэдые бэлдэнэ. Тиин эндэ һуража гараһан Илья Михалев мүнөө Буряад Уласай «Эсэгэ ороноо хамгаалагшад» гэжэ жаса толгойлно. 3-дахи һубарилда Буряад Уласай гурбан хүн һурана. «Муравьев-Амурский-2030» программада эгээ эрхимүүдые шэлэжэ абадаг. Тэдэ саашадаа Алас Дурнын экономико, ниигэмэй һалбари хүгжөөхэ. Иимэ модуль манай уласта үнгэргэгдэжэ байһандань баяртайбди, эндэ манай ажалай жэшээнүүд харагдана, бэрхэшээлнүүдээр шиидхэбэри абаха дурадхалнууд дээрэ һурагшад хүдэлнэ. Иимэ түсэлнүүд манда хэрэгтэй, - гэжэ Алексей Цыденов тэмдэглэбэ.

Болбосоролой "Муравьев-Амурский-2030" программын түсэлэй офисой хүтэлбэрилэгшэ Ксения Кишкаревагай хэлэһээр, курсантнуудай бэлэн болоһон түсэлнүүд Алас Дурна ба Арктика хүгжөөлгын сайд Алексей Чекунковто һаяын үдэрнүүдтэ харуулагдаха.

- Буряад Уласай Толгойлогшо Алексей Самбуевич Цыденов уласай, Алас Дурнын тойрогой дүй дүршэлөөр хубаалдана. Тэрээнһээ гадуур бүлгэмүүдэй дурадхаһан үүсхэлнүүд тухай зүбшэн хэлсэхэ, нэмэлтэ һэлгэлтэнүүдые оруулха ажал ябуулагдахаар хараалагдана. Түсэлнүүд нэнэ түрүүн Алас Дурнын тойрогой нютаг можонуудай бодолгонуудые бэелүүлхэ, бэрхэшээлнүүдые шиидхэхэ зорилготой. Түгэсхэлэй шатада Алас Дурна ба Арктика хүгжөөлгын сайд Алексей Чекунков, Алас Дурнын нютаг можонуудай толгойлогшод эдэ үүсхэлнүүдтэй танилсаха. Үүсхэлнүүд дэмжэгдэжэ, тойрогой субъектнүүдэй дэбисхэрнүүд дээрэ нэбтэрүүлэгдэхэ бэзэ, найданабди, - гэжэ Ксения Кишкарева хэлэбэ.

Программада Россиин бүхы можо нютагуудай ажаһуугшад хабаадана. Һуралсалай удаа тэдэ заабол Алас Дурнын тойрогто ажалда орохо эрилтэтэй, юундэб гэхэдэ, холбоото уласай хүтэлбэрилхы команда шангадхаха зорилго табигдана. 3-дахи һубарилай шэлэн абалгын шатада нэгэ һуурида 80 хүн эрмэлзэһэн байгаа гэжэ тэмдэглэлтэй.